თენგიზ ცეკვავა: სამართლებრივი სტატისტიკის შესახებ მონაცემებს შსს სისტემატიურად გვაწვდის

“შინაგან საქმეთა სამინისტრო სტატისტიკის ეროვნულ სამსახურს სისტემატიურად, კვარტალური პერიოდულობით აწვდის მონაცემებს სამართლებრივი სტატისტიკის შესახებ, რაც განსაზღვრულია ქვეყნის მთავრობის მიერ სტატისტიკურ სამუშაოდ სახელმწიფო პროგრამაში მოცემული პირობებით. აღნიშნული პროგრამა გულისხმობს კვარტალური პერიოდულობით ზუსტ თარიღებში სტატისტიკური მონაცემების გამოყენებას. აღნიშნული მონაცემები ქვეყნდება და ხელმისაწვდომია საქსტატის ვებსაიტზე-განაცხადა “საქსტატის” დირექტორის მოადგილემ თენგიზ ცეკვავამ.
დანაშაულის სტატისტიკის შესახებ განცხადება გუშინ პარლამენტში გაკეთდა. „ნაციონალური მოძრაობის“ წევრის ოთარ კახიძის ბრალდებას, რომ შინაგან საქმეთა სამინისტრო დანაშაულის, მათ შორის ყაჩაღობის რეგისტრაციას არ ახდენს, შს მინისტრობის კანდიდატი გიორგი მღებრიშვილი გამოეხმაურა. მისი განცხადებით, „საქსტატს“ 3 თვეში ერთხელ მიეწოდება სტატისტიკა, რომელიც მას კვარტალში ერთხელ აქვეყნებს, თუმცა კახიძემ აღნიშნა, რომ “საქსტატის” გვერდზე შსს-ს სტატისტიკა არ დევს.