მწერალი დათო ტურაშვილი უკმაყოფილოა მხარდაჭერის იმ მასშტაბით, რომელსაც საქართველოს ხელისუფლება უკრაინის მიმართ გამოხატავს. ამის შესახებ დათო ტურაშვილმა „ტვ პირველის“ ეთერში ისაუბრა. მწერალი ამბობს, რომ ხელისუფლების პოზიცია არამკვეთრია და განსაკუთრებულ გულისწყრომას საქართველოს პარლამენტის თავმჯდომარის მიმართ გამოხატავს.
“მე არ ვდარდობ, რომ საქართველოს ხელისუფლებას არ აქვს უკრაინის მხარდაჭერის მიმართ მკვეთრი პოზიცია. ეს თავის თავს დააბრალონ, რაც მოუვათ ამის გამო… ასზე მეტი ბავშვია მკვდარი. ასეთი რამე მართლა წარმოუდგენელია, ფაშისტებს არ გაუკეთებიათ, რასაც ახლა აკეთებს პუტინის არმია. ვინც ვერ ხვდება, ვისკენ უნდა იყოს ახლა, ეს მათი პრობლემაა.
სხვათა შორის პარლამენტის თავმჯდომარის შალვა პაპუაშვილის წერილი წავიკითხე… ჯერ ერთი რატომ უნდა იყოს დამოუკიდებელი საქართველოს პარლამენტის თავმჯდომარე ვიღაც პაპუაშვილი, რა გააკეთა საქართველოს დამოუკიდებლობისთვის? შეიძლება მე გამომრჩა და ყველას ვეკითხები, როგორ გახდა ეს კაცი პარლამენტის თავმჯდომარე?
მაგრამ ამას თავი დავანებოთ. წერილს წერს უკრაინის რადას თავმჯდომარეს, რომ თქვენ რომ გგონიათ, ჩვენ თქვენკენ არ ვართ, სინამდვილეში თქვენკენ ვართო. ჰგონიათ, რომ მათ არ იციან? – ყველაფერი იციან, ყველა სიტყვა და ბგერა,” – განაცხადა დათო ტურაშვილმა.
ცნობისათვის, საქართველოს პარლამენტის თავმჯდომარემ უკრაინის პარლამენტის თავმჯდომარეს რუსლან სტეფანჩუკს ღია წერილით მიმართა.
„გულდაწყვეტილები ვართ, რომ პოლიტიკურმა სპეკულაციებმა და აბსოლუტურ დეზინფორმაციაზე დაფუძნებულმა კამპანიებმა ჩრდილი მიაყენა საქართველოს მხრიდან უკრაინისადმი მტკიცე და უანგარო მხარდაჭერას და სოლიდარობას. ბრალდება საქართველოს მიერ უკრაინის მხარდაჭერის გზიდან გადახვევასთან დაკავშირებით უბრალოდ არ შეესაბამება სიმართლეს. ბატონო თავმჯდომარევ, დარწმუნებული იყავით, რომ ქართველი ხალხი და საქართველოს ხელისუფლება ვართ ერთიანი, და არა დაყოფილი, უკრაინისადმი მხარდაჭერასთან დაკავშირებით და ჩვენ მომავალშიც გავაგრძელებთ თქვენს თანადგომას,“ – ნათქვამია შალვა პაპუაშვილის მიმართვაში.