მიკოლაივზე სარაკეტო დარტყმის შედეგად მასობრივი მსხვერპლის შესახებ ცნობები ვრცელდება. აღნიშნულ ინფორმაციას BBC ავრცელებს.
ბრიტანული მედიასაშუალების ცნობით, რუსეთის მხრიდან განხორციელებული სარაკეტო თავდასხმის შედეგად, დაღუპულია სულ მცირე 45 ადამიანი.
BBC-ის კორესპონდენტი, ენდრიუ ჰარდინგი, რომელიც ოდესაში იმყოფება, აცხადებს, რომ მიკოლაივის ჩრდილოეთით გარეუბანში მდებარე სამხედრო ყაზარმებს სულ მცირე ორი რაკეტა მოხვდა.
ადგილზე ამ დროისთვის სამაშველო სამუშაოები მიმდინარეობს.
ჰარდინგი ჰყვება, რომ აღნიშნული ყაზარმები ადგილობრივი ჯარისკაცების მოსამზადებლად გამოიყენებოდა. მიკოლაივზე საუბრისას, BBC-ის კორესპონდენტი აცხადებს, რომ ეს ქალაქი რუსეთის მთავარ შეტევას შავი ზღვის სანაპიროზე აფერხებს.
„მას შემდეგ, რაც რუსეთის ჯარი ქალაქიდან გააძევეს, მიკოლაივმა კვირების განმავლობაში ინტენსიური დაბომბვები გამოსცადა. ამის შემდეგ რუსულმა სამხედრო შენაერთებმა ქალაქის გვერდის ავლით, ჩრდილოეთით გადაადგილება სცადეს, რაც უკრაინელებმა ასევე აღკვეთეს. ბევრი მშვიდობიანი მოქალაქე უკვე გაიქცა დასავლეთის მიმართულებით“, – აღნიშნავს ჰარდინგი.