სატრანსპორტო გადაადგილების სირთულეები არამხოლოდ რეგიონების მასშტაბით, არამედ დედაქალაქშიც შეიქმნა. „თბილსერვის ჯგუფში“ აცხადებენ, რომ გაწმენდითი სამუშაოები მთელი ღამის განმავლობაში მიმდინარეობდა, თუმცა ძლიერი თოვის გამო, დილით გზების ნაწილზე ავტომობილებით გადაადგილება მაინც გართულებულია.
„დედაქალაქში ინტენსიური თოვის გამო თბილსერვისი დაახლოებით მე-10, მე-11 დღეა გაწმენდით სამუშაოებს ახორციელებს, თუმცა, უჩვეულო ნალექის გამო სამუშაოები შეფერხებით მიმდინარეობს. იყრება ტექნიკური მარილი, მობილიზებულია სპეცტექნიკა. დამატებით გამოძახებულია გამწმენდი მანქანები, რომლითაც ვცდილობთ, რომ პარალიზებული არ იყოს ცენტრალური ქუჩები, გამზირები, სადაც საზოგადოებრივი ტრანსპორტი გადაადგილდება, პრიორიტეტი ესაა. თუმცა, ინტენსიური ნალექის გამო ისე ეფექტურად ვერ მუშაობს ტექნიკური მარილი და გვაქვს ადგილები სადაც შეფერხებით გადაადგილდება ტრანსპორტი. დაახლოებით 4000 ტონამდე მარილია დაყრილი ამ ათი დღის განმავლობაში. პროგნოზი საიმედოა, რამდენიმე დღეში ალბათ დაიკლებს თოვა და შემდგომ უკვე ყველა ქუჩას გავწმენდთ“, – განაცხადა „თბილსერვის ჯგუფის„ დირექტორმა დავით ფაჩულიამ.