ხერსონში ჰუმანიტარული მდგომარეობა გართულებულია. საომარი მოქმედებები იქ არ მიმდინარეობს, მაგრამ არის რუსეთის არმიის კონტროლის ქვეშ და საკმაოდ გართულებულია სურსათის მიწოდება და ზოგადად ცხოვრების პირობები. იქ არიან საქართველოს მოქალაქეებიც. ჩვენი გენ. საკონსულო ოდესაში მათთან ხაზზე იყო და რამდენიმე ათეული ადამიანი გამოვიდა კიდეც ჩვენი საკონსულოს დახმარებით, თუმცა გარკვეული რაოდენობა დარჩა. ჩვენი გენერალური კონსული ისევ ხაზზეა და ცდილობს ამ ხალხის გამოყვანას, – ამის შესახებ „ქრონიკაში“ ჩართვისას საქართველოს ელჩმა უკრაინაში, გიორგი ზაქარაშვილმა განაცხადა.
„რაც შეეხება მარიოპოლს, იქ ვითარება უფრო რთულია, ვინაიდან არანაირი კავშირი არ არსებობს. მიმდინარეობს საბრძოლო მოქმედებები და დაბომბვა როგორც ციდან, ასევე ზღვიდანაც. ვინაიდან არ გვაქვს კავშირი არ ვიცით საქართველოს რამდენი მოქალაქეა იქ, მაგრამ გამოსული ადამიანებისგან ვიცით, რომ იქ ქართველები არიან“, – განაცხადა უკრაინაში საქართველოს ელჩმა.