შინაგან საქმეთა სამინისტროს საგანგებო სიტუაციების მართვის სამსახურის თანამშრომლები სასწავლო ვიზიტით ესტონეთის რესპუბლიკაში იმყოფებოდნენ, სადაც თოკზე სამაშველო საკითხებზე გამართული სწავლება გაიარეს. სასწავლო კურსში საქართველოს სხვადასხვა რეგიონიდან ჩართული 9 მეხანძრე-მაშველი მონაწილეობდა. სახანძრო-სამაშველო ძალების დეპარტამენტის თანამშრომლებმა 6 დღიანი სწავლების მიმდინარეობისას კვალიფიკაცია აიმაღლეს როგორც თეორიული, ასევე, პრაქტიკული მიმართულებითაც.
კურსის ფარგლებში ესტონელი ექსპერტების მიერ დეტალურად იყო განხილული თოკის გამოყენებით სხვადასხვა სახის სამაშველო ოპერაციის ჩატარების სპეციფიკა და არსებული გამოცდილება. გარდა ამისა, ქართულმა დელეგაციამ მიიღო ინფორმაცია ესტონეთის სასწავლო სისტემის შესახებ და დაათვალიერა ადგილობრივი სამაშველო-სასწავლო ინფრასტრუქტურა.
სწავლება ევროკავშირის UCPM-ის ექსპერტთა გაცვლის პროგრამის ფარგლებში გაიმართა. სასწავლო კურსის დასრულების შემდეგ თითოეულ მონაწილეს სპეციალური სერტიფიკატი გადაეცა.