„საომარი ვითარებების დროს, უკრაინის უშიშროების საბჭოს მდივანი ვერ დაკავდება თვითშემოქმედებით და განცხადებებს, განსაკუთრებით მოწოდების სახით, ვერ გააკეთებს მთავრობასთან შეუთანხმებლად“, – ასე ეხმიანება ანალიტიკოსი ზურაბ ქადაგიძე უკრაინის ეროვნული უშიშროებისა და თავდაცვის საბჭოს მდივნის ალექსეი დანილოვის განცხადებას.
როგორც ქადაგიძე წერს, ასეთი განცხადება ყველაზე არამეგობრულია, რაც ჩვენი ხალხების ურთიერთობას არ ეკადრება.
„ბატონო მდივანო! საქართველო 30 წელია საკუთარი სუვერენიტეტისა და ტერიტორიული მთლიანობის უზრუნველსაყოფად, პირდაპირ, გაცხადებულ ომშია რუსეთის ფედერაციასთან, რასაც მოწმობს 1991, 1993, 2004, 2008 წლები, ათასობით დაღუპული ქართველი, ასიათასობით დევნილი ოჯახი, ოკუპირებული აფხაზეთი და ე.წ სამხრეთ ოსეთი. თქვენი განცხადება ყველაზე არამეგობრულია, რაც ჩვენი ხალხების ურთიერთობას არ ეკადრება. სხვისი უბედურებით საკუთარის შემსუბუქების მცდელობა, მინიმუმ უღირსი საქციელია“, – წერს ანალიტიკოსი Facebook-ზე.
უკრაინის ეროვნული უშიშროებისა და თავდაცვის საბჭოს მდივანმა ალექსეი დანილოვმა განაცხადა: „სხვა ქვეყნების ტერიტორიებზე დამატებითი ფრონტების გახსნა უკრაინას რუსეთის წინააღმდეგ ბრძოლაში დაეხმარებოდა. დნესტრისპირეთი, საქართველო და ყველა დღეს დაკავებული რომ იყვნენ თავიანთი ტერიტორიების დაბრუნებით, უფრო მეტიც, პოლონეთს ჯერ ოფიციალურად არ გამოუთქვამს პრეტენზია კალინინგრადის რეგიონზე, ეს აუცილებლად დაგვეხმარებოდა, რადგან რუსებს ექნებათ რაიმე გასაკეთებელი გარდა ჩვენი ქალაქებისა და სოფლების განადგურებისა, ჩვენი ბავშვებისა და ქალების მკვლელობისა“.