პარლამენტის შენობასთან დაწყებული აქციის ათობით მონაწილე მთელი ღამის განმავლობაში კანცელარიასთან დარჩა. ორგანიზატორთა არაპროგნოზირებადმა და არაორგანიზებულმა მსვლელობებმა აქციაზე მყოფი საზოგადოების საგრძნობლად შემცირება გამოიწვია და პარლამენტის შენობასთან დაწყებული პროტესტი მთავრობის ადმინისტრაციასთან მჯდომარე აქციად გადაიქცა.
ისინი მთავრობის სხდომის ჩანიშვნას ელოდებიან, იმისთვის რომ საკუთარი მოთხოვნები პრემიერ-მინისტრსა და მთავრობის წევრებს გააცნონ. მათი სამომავლო გეგმების შესახებ ინფორმაცია არ ვრცელდება.
აქცია „შინ ევროპისკენ“ საღამოს 20:00 საათზე, პარლამენტის შენობასთან დაიწყო. ადგილზე შეკრებილი განსხვავებული პოლიტიკური შეხედულების საზოგადოება აქციის ორგანიზატორებისგან კონკრეტულ სამოქმედო გეგმას ითხოვდნენ. ორგანიზატორებმა კი საზოგადოებას „ქართული ოცნების“ ოფისისკენ წასვლა მოსთხოვეს, რამაც აქციაზე მყოფი ხალხის გარკვეულ ნაწილში, მათ შორის სტუდენტებში, უკმაყოფილება გამოიწვია.
„ნაცმოძრაობის“ მომხრეები აქციაზე სიტყვით გამომსვლელთა პარალელურად აჟღერებდნენ საკუთარ მოთხოვნას მიხეილ სააკაშვილის დაუყოვნებლივი გათავისუფლების შესახებ.