საქართველოს პრემიერ-მინისტრის ინიციატივით მიმდინარე პროგრამა „განახლებული რეგიონების“ ფარგლებში, ქობულეთში ახალი 1კმ-მდე სიგრძის ბულვარის რეაბილიტაცია-კეთილმოწყობის სამუშაოები დასრულდა.
ქობულეთის ახალი ბულვარი დღეს ოფიციალურად საქართველოს რეგიონული განვითარებისა და ინფრასტრუქტურის მინისტრმა ირაკლი ქარსელაძემ და აჭარის ავტონომიური რესპუბლიკის მთავრობის ხელმძღვანელმა, თორნიკე რიჟვაძემ გახსნეს.
,,ქობულეთს უკვე ახალი კილომეტრამდე სიგრძის ბულვარი აქვს, რომელიც პრემიერ-მინისტრის ინიციატივით მიმდინარე პროგრამა ,, განახლებული რეგიონების“ ფარგლებში აშენდა, პროექტში 8 მილიონ ლარზე მეტია ინვესტირებული. აღსანიშნავია, რომ ყველა ასაკის ადამიანისთვის მოეწყო შესაბამისი სივრცე, ველობილიკები, სპორტული ინფრასტრუქტურა, რეკრეაცია, საინჟინრო ქსელები, ირიგაციის წყალსარწყავი სისტემები, რეალურად ეს არის ახალი სივრცე, რომელმაც შექმნა ახალი შესაძლებლობები, როგორც მოსახლეობისთვის ისე დამსვენებლებისთვის. შეიქმნა კიდევ ერთი საინტერესო სივრცედა მიზიდულობის წერტილი. ვულოცავ ქობულეთს და ეს არის მხოლოდ პირველი ეტაპი, რომელიც აუცილებლად გაგრძელდება. შეგახსენებთ რომ 63-ვე მუნიციპალიტეტში მიმდინარეობს აღნიშნული პროგრამა წარმატებით.მხოლოდ პირველ ეტაპზე 500 მილიონი ლარის ინვესტირება არის განსაზღვრული, საიდანაც უკვე დაკონტრაქტებული და ანაზღაურებულია 350 მილიონ ლარზე მეტი ღირებულების პროექტები“,- განაცხადა ირაკლი ქარსელაძემ.
პროგრამა „განახლებული რეგიონების“ ფარგლებში, ქობულეთში სანაპირო ზოლის რეაბილიტაციისა და კეთილმოწყობის სამუშაოები 2021 წლის ზაფხულში დაიწყო. სამუშაოების ღირებულებამ 8,100,000 ლარი შეადგინა.
პროექტის მიხედვით, მდინარე აჭყვადან მდინარე კინტრიშამდე მდებარე 1კმ-მდე სიგრძის სანაპირო ზოლზე მოეწყო ბულვარი. ბულვარის მთელ სიგრძეზე აშენდა გამყოფი კედელი, 2.5 მეტრის სიგანის ველო ბილიკი და 4 მეტრის სიგანის საფეხმავლო ბილიკი. საფეხმავლო ბილიკის მიმდებარედ მოეწყო რეკრეაციული და კომერციული ზონები. საბავშვო-გასართობ სივრცეებში დაიდგა ატრაქციონები, ხოლო სპორტულ ზონაში მოეწყო ქვიშის ფრენბურთისა და ქვიშის ფეხბურთის მოედნები.ახალ ბულვარში აშენდა ადაპტირებული სანიტარული კვანძები, ძველ ბულვართან დასაკავშირებლად კი, აშენდა საფეხმავლო ხიდი.
ახალი ბულვარის სანაპირო ზოლი, სამუშაოების დასრულებამდე, სრულიად გამოუსადეგარი იყო დამსვენებელთათვის. დღეს განახლებული, თანამედროვე სტანდარტების შესაბამისად კეთილმოწყობილი ბულვარით უკვე ისარგებლებენ როგორც მის მიმდებარედ მცხოვრები მოსახლეობა, ისე კურორტის სტუმრები.
პროგრამის „განახლებული რეგიონები“ პირველი ეტაპის სამუშაოები დასრულების ეტაპზეა ქვეყნის 63 მუნიციპალიტეტში. მიმდინარეობს 500-ზე მეტი შენობის და 80-მდე პარკისა და სკვერის რეაბილიტაცია. სამუშაოების ფარგლებში, შენობების კარ-ფანჯრები შეიცვალა ახალი იზოპროფილის ვიტრაჟებით, გაძლიერდა ენერგოეფექტურობის კომპონენტი თბოიზოლაციით, მოწესრიგდა მიმდებარე საფეხმავლო ზოლები, გამწვანდა სკვერები, მოეწყო სარწყავი სისტემა, დამონტაჟდა ბავშვთა გასართობი ატრაქციონები და სხვა.
„განახლებული რეგიონების“ 4-წლიანი პროგრამა 2021 წელს, საქართველოს პრემიერ-მინისტრის ინიციატივით დაიწყო. პროგრამის ფარგლებში განსახორციელებელი პროექტები მუნიციპალიტეტების უშუალო ჩართულობით შეირჩა. პროგრამის პირველი ეტაპის საორიენტაციო ღირებულებამ 500 მილიონი ლარი შეადგინა. ზოგიერთ მუნიციპალიტეტში უკვე დაიწყო პროგრამის მეორე ეტაპის სამუშაოებიც.