გუშინ, გვიან ღამით ბორჯომში ტელეკომპანია „იბერიის“ ტელეწამყვანი და მსახიობი, გიორგი გასვიანი საკუთარ მანქანაში მთვრალმა პოლიციელმა და მისმა მეგობრებმა სცემეს. ჩვენ გიორგის შემთხვევის დეტალები გამოვკითხეთ.
გიორგი გასვიანი:
– ბორჯომიდან მოვდიოდი, სადაც ერთ-ერთ სასტუმროში ჟურნალისტური სემინარები ტარდებოდა. გზა ამერია, სხვა შესახვევში შევედი და მანქანა მომიცურდა, ძრავი ჩამიქრა და ვეღარ დავამუხუჭე. მაინც მოვახერხე გაჩერება, ისე რომ მათ სავალ ნაწილზე არ გადავსულიყავი. სამართალდამცავებმა ამის გამო ფიზუკური და სიტყვიერი შეურაცხყოფა მომაყენეს. ეს ყველაფერი იარაღის მუქარის ქვეშ ხდებოდა. თავში და სახეში მირტყამდნენ იარაღს.
– მარტო იყავი?
– მარტო ვიყავი. „კაპიშონით“ ვიყავი, ვერ მიცნეს, ვუთხარი ჟურნალისტი ვარ-მეთქი. მთვრალები იყვნენ. ჯერ გვერდზე გამიარეს, მერე მობრუნდნენ, საქარე მინა ჩამოვწიე და ვუხსნი რა დამემართა. ვინ ამახსნევინა. გადმოვიდა პოლიციელი მანქანიდან, ჩვენი მოკვლა გინდოდაო, მიყვიროდა. მირტყა და მირტყა. ხელები ავიფარე სახეზე, საჭისკენ მქონდა თავი. იარაღი რომ მომადო, ვიგრძენი.
– პოლიციალის სახელი და გვარი იცი?
– პოლიციელი გახლდათ მიშა ხუციშვილი. მისი თანმხლები პირების ვინაობა არ ვიცი. ისინი სავარაუდოდ მისი ძმაკაცები იყვნენ. ისინიც გადმოვიდნენ მანქანიდან და მირტყავდნენ. რომ გაიგეს ჟურნალისტი ვიყავი, იქიდან ერთ-ერთმა ჩემი დაცვა დაიწყო. მერე მომიყვანეს სასტუმროში იმ პირობით, რომ არავის არაფერს არ ვეტყოდი და ამ ამბავს არ გავასაჯაროვებდი. ტელეფონის ნომერს მთხოვდნენ. არ ვეუბნებოდი, რად გინდათ ჩემი ნომერი, დავშორდეთ ისე თითოს არ ვიცნობთ ერთმანეთს-მეთქი და ასე გამოვიძვრინე თავი. სხვა შემთხვევაში არ გამომიშვებდნენ.
– მაინც გაბედე და თქვი…
– ვთქვი იმიტომ რომ ხვალ შეიძლება სხვა აღმოჩნდეს ჩემ დღეში. წარმომიდგენია რას უზამდნენ სხვას ჩემ ადგილზე. მე პროფესიამ გადამარჩინა. მთელი მედია და გენინსპექცია დაინტერესებულია ამ ფაქტით. შინაგან საქმეთა სამინისტრომაც გააკეთე კომენტარი. მადლობა მინდა გადავუხადო ჟურნალისტებს, რომლებიც ამ ამბით დაინტერესდნენ, დილიდან ჩემი ტელეფონი არ გაჩერებულა.
www.primetime.ge