ვარძიის ნახანძრალი მხატვრობის გაურკვეველი ბედი

ვარძიის ღვთისმშობლის სახელობის ტაძარში ხანძარი 2016 წლის 1–ელ ნოემბერს, ღამით გაჩნდა; მწუხრის ლოცვის შემდეგ, გვიან ღამით, ვარძიაში მცხოვრებ ბერებს ეკლესიაში კვამლი დახვდათ;

ბერების ვარაუდით, სვეტიდან ანთებული სანთელი გადმოვარდა, ცეცხლი ჯერ ხალიჩას, შემდეგ კი ხის მაგიდას მოედო. ეკლესიის კედლის მხატვრობა ჭვარტლით დაიფარა;

იმავე დღიდან ვარძიის ტაძარი ტურისტებისა და მლოცველებისთვის დაიკეტა და პირველადი სამუშაოები დაიწყო – სპეციალისტებმა მხატვრობის მშრალი მეთოდით გაწმენდვა დაიწყეს;

პირველადი სამუშაოები ნოემბრის ბოლომდე გაგრძელდა; ახლა სამუშაოები შეჩერებულია.

ტაძარში სამუშაოებს იანვრიდან, ლონდონის უნივერსიტეტის კურტოს ხელოვნების ინსტიტუტის წარმომადგენლები გააგრძელებენ;

დაუბრუნდება თუ არა მხატვრობა პირვანდელ სახეს, რესტავრატორებს გადაჭრით თქმა უჭირთ, ვინაიდან სანთლები პარაფინის შემცველობის იყო;

პროკურატურა მომხდარს სსკ–ის 188–ე მუხლით იძიებს, რაც გაუფრთხილებლობით ნივთის დაზიანებას გულისხმობს. საქმეზე ჯერ დადგენილი არაფერია;

ვარძიაში, ღვთისმშობლის სახელობის ტაძარი, მე–12 საუკუნეში, თამარ მეფის ბრძანებით აშენდა. ხანძრის დროს ჭვარტლმა, ტაძრის მთელი მოხატულობა დაფარა. მათ შორის, თამარისა და გიორგი მესამის უნიკალური ფრესკა.

www.sknews.ge