ეს არის აკაკი ბობოხიძის აღსარება, არის დაგვიანებულიც და ცოტაც, თუმცა, კარგია, რომ ასეთ განცხადებებს უკვე ვისმენთ, – ამის შესახებ საქართველოს პარლამენტის თავმჯდომარის მოადგილემ არჩილ თალაკვაძემ განაცხადა.
„ეს არის არა აკაკი ბობოხიძის განცხადება, არამედ აკაკი ბობოხიძის აღსარება. ეს არის დაგვიანებულიც და ცოტაც, იმასთან შედარებით, რაც ხდებოდა, თუმცა, კარგია, რომ საბოლოო ჯამში ასეთ განცხადებებს უკვე ვისმენთ, რადგან ეს დიდი ხნით ადრე უნდა გაეკეთებინათ „ნაციონალური მოძრაობის“ მაშინდელ წარმომადგენლებს. ყველას გვახსოვს რა ხდებოდა და ალბათ, მხოლოდ ერთი განცხადებით შეუძლებელია იმის აღწერა, როგორ მუშაობდა მაშინდელი ხელისუფლება. ისინი არღვევდნენ ყველა ფუნდამენტურ უფლებას, რაზეც დგას თანამედროვე საზოგადოება, ევროპა, დასავლეთი და ამით რეალურად რუსულ საქმეს აკეთებდნენ“, – აღნიშნა არჩილ თალაკვაძემ.
„ნაციონალური მოძრაობის“ ყოფილმა წევრმა აკაკი ბობოხიძემ განაცხადა, რომ მათი მმართველობის დროს იყო ავტორიტარიზმი და ძალაზე დამყარებული წესრიგი.