იმ ცვლილებებს, რომელზეც საკამათოც არაფერია, სწორედ ვაშაძის პარტიამ არ დაუჭირა მხარი – ეს ნიშნავს იმას, რომ ეს ის პარტიაა, რომელსაც სურვილი აქვს 12 პუნქტის მიმართულება დააზიანოს, – ამის შესახებ საპარლამენტო უმრავლესობის წევრმა, მიხეილ სარჯველაძემ „ქრონიკასთან“ განაცხადა.
„სრულად სამოქალაქო სექტორის ჩართულობით, აკადემიური წრეების ჩართულობით, საერთაშორისო ორგანიზაციების ჩართულობით მომზადდა პაკეტი. ყველა იდეას თავი მოეყარა რაც კი არსებობდა და ასეთ პაკეტსაც კი მხარი არ დაუჭირეს. ეს ნიშნავს იმას, რომ ეს ის პარტიაა, რომელსაც სურვილი აქვს 12 პუნქტის მიმართულება დააზიანოს. ეს გასაგებია რადგან, მათი ვიწროპარტიული გადმოსახედიდან გამომდინარე ისინი ხვდებიან, რომ დგანან იმ რისკის წინაშე, როდესაც ხელისუფლებას სასაყვედურო არაფერი ექნება, მათ შორის ჩვენი მოსახლეობის, ჩვენი საერთაშორისო პარტნიორების თვალში 12 პუნქტის შესრულებასთან დაკავშირებით. და რა უნდა ქნან, მერე შეეგუონ იმას, რომ ხელისუფლება სწორი მიმართულებით უძღვება ქვეყანას? – ეს არ აწყობთ და ამას ყველანაირად ხელს უშლიან. სამწუხაროდ იგივე ინტერესი განაპირობებს იმას, რომ ბატონი ვაშაძე, ან ბატონი ჯაფარიძე ცდილობს რომ ამას ხელი შეუშალონ“, – განაცხადა სარჯველაძემ.