რუსი ნაციონალისტები და კანონმდებლების ნაწილი, ოკუპირებულ მაკიივკაზე მიტანილი მასშტაბური სარაკეტო იერიშის შემდეგ, სამხედრო ხელმძღვანელების დასჯას ითხოვს.
როგორც გამოცემა Reuters წერს, ისინი სამხედრო ხელმძღვანელობას მოსალოდნელი საშიშროების იგნორირებაში სდებენ ბრალს და ამტკიცებენ, რომ რუსი ჯარისკაცები არასათანადო ადგილას, საბრძოლო მასალის საწყობის მიმდებარე ტერიტორიაზე იყვნენ დაბანაკებულები, რომელსაც 4 რაკეტა მოხვდა, რასაც ასობით რუსი სამხედრო ემსხვერპლა.
ოფიციალური მოსკოვი კი ამტკიცებს, რომ ოკუპირებული დონეცკის რეგიონის ქალაქში განხორციელებული სარაკეტო თავდასხმისას მხოლოდ 63 ჯარისკაცი დაიღუპა.
რუსეთის რამდენიმე ქალაქში გარდაცვლილებისთვის პატივის მისაგებად უკმაყოფილო ადამიანების მსვლელობებიც გაიმართა.
შეგახსენებთ, რომ ოკუპირებულ მაკიივკაზე სარაკეტო თავდასხმა ახალი წლის ღამეს მოხდა. უკრაინული მხარის განცხადებით, იერიშის შედეგად 400-მდე რუსი მობილიზებული მოკვდა, ხოლო 300-მდე დაიჭრა.