ჩემი ვარაუდით, ოპოზიციაში თვითონაც კარგად ხვდებიან, რომ არის გარკვეული გუნდი, რომელიც თუ თვითონ არ იქნება შემოქმედი რაღაც პოლიტიკური მეჯლისების, არ აქვს სურვილი, რომ ჩართული იყოს. სხვა უფრო დამაჯერებელი ახსნა მე არ მესახება, – ამის შესახებ საპარლამენტო უმრავლესობის წევრმა, მიხეილ სარჯველაძემ ოპოზიციის მხრიდან რიგგარეშე სესიის გადადების კომენტირებისას განაცხადა.
„რეალურად ამ მოთხოვნების უკან. მე ვფიქრობ, რომ არც არაფერი შინაარსიანი არ იყო. ხომ ასე მუშაობს პარლამენტი: ერთი კვირა არის კომიტეტის სხდომები და მეორე კვირაში იმართება პლენარული სხდომები. მომდევნო კვირაში, 18 აპრილს დაგეგმილია პლენარული სხდომა. რატომ არის შეუძლებელი, რომ მოითმინოს 18 აპრილამდე და რატომ არის აუცილებელი, რომ საგანგებოდ დაინიშნოს პლენარული სხდომა საკომიტეტო კვირაში? ინიშნები კომიტეტის სხდომები, ადამიანებს აქვთ კონკრეტული გეგმები დასახული, მაჟორიტარები დადიან სადღაც და ნიშნავს სამი დღით ადრე. რას წყვეტს? უბრალოდ ვინმემ ამიხსნას და კი ბატონო. თვითონაც იციან, რომ მათ სჭირდებათ გარკვეული იმიტაციები მუშაობის“, – განაცხადა მიხეილ სარჯველაძემ.
46 დეპუტატი სალომე ზურაბიშვილს ჯერ პარლამენტის რიგგარეშე სხდომის მოწვევას სთხოვდა, სადაც დღეს საგამოძიებო კომისიის შექმნის საკითხზე კენჭისყრა უნდა გამართულიყო, თუმცა გუშინ საღამოს გადაიფიქრეს და პრეზიდენტს ამჯერად უკვე მიმართავენ, მათ მიერ მოთხოვნილი რიგგარეშე სესია დღეისთვის აღარ მოიწვიოს.
როგორც თავად განმარტეს, გადაწყვეტილების შეცვლის მიზეზი გახდა ის, რომ ორმა დეპუტატმა – ანა წითლიძემ და ლევან ხაბეიშვილმა ქვეყანა დაუგეგმავად დატოვეს და შესაბამისად, ოპოზიციას არ ჰყოფნის ხმები იმისათვის, რომ საგამოძიებო კომისიის შექმნასთან დაკავშირებით გადაწყვეტილება მიიღოს.