„გირჩის“ ლიდერი, დეპუტატი იაგო ხვიჩია BBC-ის მიერ ჩატარებულ ჟურნალისტურ გამოძიებას გამოეხმაურა, სადაც გაშიფრულია ევროპელი პენსიონრების გაძარცვის სქემა, ხოლო თაღლითური სქემის ორგანიზატორად საქართველოს თავდაცვის ყოფილი მინისტრი დავით კეზერაშვილია დასახელებული.
„სანამ ეს გამოძიება მორჩება, „ნაცმოძრაობამ“ უარი ხომ არ უნდა თქვას კეზერაშვილის მიერ გაწეულ დახმარებაზე და, ზოგადად, კეზერაშვილთან ურთიერთობაზე? კეზერაშვილის ფაქტორის გარშემო გაერთიანებული ოპოზიცია როგორ უნდა გავიდეს არჩევნებზე, თუ ის ასეთი ბრალდებით არის დამძიმებული? ამიტომ „ნაცმოძრაობა“ თვითონ უნდა გაემიჯნოს კეზერაშვილს ამ საქმის ან ასე, ან ისე გადაწყვეტამდე. მე მაინტერესებს, ქართულ იურისდიქციაში თუ ხდებოდა ეს ყველაფერი. დოკუმენტებშიც არის, რომ საქართველოშიც იყო დარეგისტრირებული კომპანია და აქედანაც ყვლეფდნენ ევროპელ პენსიონერებს. ეს ნაწილი შეუძლებელი მგონია, სახელმწიფო სისტემასთან შეთანხმების გარეშე ხდებოდეს“ – აცხადებს ხვიჩია.