“უკრაინის შეიარაღებული ძალები დაცვიდან ბახმუტის მიმართულებით შეტევაზე გადავიდნენ”

უკრაინის შეიარაღებული ძალები დაცვიდან შეტევაზე გადავიდნენ, – ამის შესახებ უკრაინის თავდაცვის მინისტრის მოადგილემ, ანა მალიარმა განაცხადა.

უკრაინის თავდაცვის უწყებაში აცხადებენ, რომ ბოლო ერთი დღის განმავლობაში ბახმუტის მიმართულების სხვადასხვა ნაწილში უკრაინის არმიამ 200-დან 1 100 მეტრამდე წაიწია წინ და ამ მიმართულებით რუსეთის არმია თავდაცვაზე გადავიდა.

უკრაინის თავდაცვის სამინისტროს ინფორმაციით, რუსეთის მხარეს საომარი მოქმედებების ძირითადი ტვირთი ახლა რუსეთის ფედერაციის რეგულარულ არმიას, მათ შორის საჰაერო-სადესანტო მოიერიშე დანაყოფებს ეკისრება.

6 ივნისს უკრაინის პრეზიდენტმა, ვოლოდიმირ ზელენსკიმ განაცხადა, რომ უკრაინის შეიარაღებულმა ძალებმა ბახმუტში „ვაგნერის“ კერძო სამხედრო კომპანიის 21 000 მებრძოლი მოკლეს, კიდევ 60 000 კი დაშავდა.