გაეროს გენერალურმა ასამბლეამ 77-ე სესიის ფარგლებში, მიიღო საქართველოსა და მსოფლიოს სხვადასხვა რეგიონის 63 ქვეყნის მიერ ინიცირებული რეზოლუცია – „აფხაზეთიდან/(საქართველო) და ცხინვალის რეგიონიდან/(სამხრეთი ოსეთი, საქართველო) იძულებით გადაადგილებულ პირთა და ლტოლვილთა სტატუსის შესახებ“.
რეზოლუციას 100-მა სახელმწიფომ დაუჭირა მხარი. საქართველო რეზოლუციას გაეროს გენერალურ ასამბლეას 2008 წლიდან წარუდგენს. რეზოლუცია გმობს რუსეთის მიერ ოკუპირებულ საქართველოს რეგიონებში ძალისმიერი გზით განხორციელებულ დემოგრაფიულ ცვლილებებს; ადასტურებს დევნილთა უფლებას, ეთნიკური კუთვნილების მიუხედავად, დაბრუნდნენ საკუთარ სახლებში ღირსეულად და უსაფრთხოდ და ხაზს უსვამს მათი საკუთრების უფლების პატივისცემისა და დაცვის აუცილებლობას.
ჰუმანიტარული კონტექსტის გარდა, რეზოლუციას აქვს პრაქტიკული დატვირთვაც, ვინაიდან ის გაეროს გენერალურ მდივანს საქართველოში მცხოვრები დევნილი მოსახლეობის მდგომარეობისა და რეზოლუციის შესრულების თაობაზე ყოველწლიური ანგარიშის მომზადებას ავალებს.
„ამ კენჭისყრის შედეგებმა აჩვენა, რომ საერთაშორისო თანამეგობრობა მტკიცედ უჭერს მხარს საქართველოს ხელისუფლების მშვიდობიან პოლიტიკას. სწორედ ამის შედეგია, რომ მხარდამჭერთა რიცხვი გაიზარდა 95-დან 100-მდე. თავისთავად, გაიზარდა თანაავტორთა რიცხვიც 61-დან 64-მდე. ეს ნიშნავს, რომ კიდევ უფრო მეტი სახელმწიფო არათუ მხარს უჭერს ამ უფლებას, არამედ როგორც თანაავტორი წარადგენს ამ დოკუმენტს“, – განაცხადა საქართველოს მუდმივმა წარმომადგენელმა გაეროში დავით ბაქრაძემ.