უკრაინამ კონტრშეტევა დაიწყო. რასაც ჩვენ ვხედავთ, არის სასტიკი ბრძოლა. ჯერ საწყისი ეტაპია, მაგრამ ვხედავთ, რომ უკრაინელებს მიღწევები აქვთ და უკრაინას შეუძლია ოკუპირებული მიწების გათავისუფლება, – ამის შესახებ იენს სტოლტენბერგმა ნატოს თავდაცვის მინისტერიალზე, ჟურნალისტებთან საუბრისას განაცხადა. ნატოს გენერალური მდივნის თქმით, ეს განპირობებულია უკრაინელი ჯარისკაცების სიმამაცითა და უნარებით, და ასევე აჩვენებს, რომ მხარდაჭერას, რომელსაც უკრაინა ნატოს მოკავშირეების მხრიდან მრავალი თვის განმავლობაში იღებს, რეალურად ბრძოლის ველზე ცვლილებები მოაქვს.
„ერთ-ერთი მთავარი საკითხი, რომელსაც ჩვენ განვიხილავთ, არის ის თუ როგორ შევინარჩუნოთ და გავაძლიეროთ უკრაინის მხარდაჭერა. ჯერჯერობით ისევ არ ჩანს ნიშანი, რომ ვლადიმერ პუტინი მშვიდობისთვის ემზადებოდეს და არ იკვეთება მოლაპარაკების სურვილი. რაც უფრო წარმატებული იქნება უკრაინის კონტრშეტევა, მით უფრო დარწმუნდება პუტინი, რომ ომს ბრძოლის ველზე ვერ მოიგებს. როდის მოხდება ეს არ ვიცით. ერთადერთი რაც ვიცით, უკრაინას უნდა გავუწიოთ სამხედრო დახმარება. ეს ერთადერთი გზაა უკრაინამ გაათავისუფლოს ტერიტორია და კრემლმა იცოდეს, რომ ომს ვერ მოიგებს“, – განაცხადა სტოლტენბერგმა.