სასამართლომ ვარკეთილში ორი ადამიანის დამამძიმებელ გარემოებებში განზრახ მკვლელობის მცდელობის ფაქტზე ბრალდებულს აღკვეთის ღონისძიების სახით პატიმრობა შეუფარდა. ბრალდებულმა ორი მეზობლის მკვლელობა სცადა. მათ დანით სხეულის სხვადასხვა არეში მრავალი ჭრილობა მიაყენა. „ქრონიკა“ ერთ-ერთ დაზარალებულს ესაუბრა.
„ღამის სამს აკლდა თხუთმეტი წუთი. აბაზანაში ვიყავი შესული და მამაჩემი მაღაზიაში იყო გასული. კარის ხმა გავიგე, მეგონა, რომ შემოვიდა მამაჩემი და შემდეგ მოჰყვა კარის ხმა მეორედ. მამაჩემის საუბარი გავიგე „შემეშვი, გადი ჩემი სახლიდან. რა გინდა?! გიჟი ხომ არ ხარ?!“ და მსგავსი ფრაზები. აბაზანიდან დავიყვირე, რა ხდება თქო. მერე მამაჩემის ხმამაღალი შეგინება გავიგე. ეგრევე გამოვედი და უკვე მამას დანას ურტყამდა. სავარაუდოდ ჯერ ეს ბიჭი შემოვიდა სახლში. რომ მივვარდი, მამაჩემს თავი დაანებე მეთქი, ამ დროს უკვე თავში ჩაარტყა დანა. დანა მეც მომიქნია. მუშტი დამარტყა სახეში, წამაქცია, მერე თმებით შემათრია აბანოში. იქ სცადა რომ გავეგუდე, დანაც დამარტყა. მერე ძირითადად ვიგერიებდი. შემდეგი ეპიზოდი იყო, რომ „ლოჯში“ გავიქეცი და იქიდან ხალხს დახმარება ვთხოვე. იქაც ძალიან მცემა. შემდეგ იქიდან რომ გამოვედით, დავინახე, რომ მამაჩემს ისევ გამეტებით ურტყამდა დანას თავში. მანდ უკვე მკვდარი მეგონა, სისხლის გუბეში იწვა. შემდეგ ჩემს ოთახში სცადა, რომ ყელი გამოეჭრა ჩემთვის და სამჯერ გავაგდებინე დანა. აქაც ძალიან მცემა. შემდეგ ბოლო ეპიზოდი იყო აივანზე, საფერფლე მირტყა თავში. ვიდეოშიც ჩანს. ამის შემდეგ სახლში შევიდა, იქ მეზობლების ხმა ისმოდა, რომ პატრული უკვე მოვიდა. შევიდა, სახლს ცეცხლი წაუკიდა და შემდეგ დაიჭირეს“, – ჰყვება ქრისტი მიქელაძე.