ტერორიზმში ბრალდებული ბადრი ესებუა განაჩენის მოლოდინშია. დღეს, სასამართლო მხარეების დასკვნით სიტყვას მოისმენს, სწორედ ამის შემდეგ გახდება ცნობილი განაჩენი.
მანამდე, ზუგდიდის რაიონულ სასამართლოში, თავად ბრალდებულ ბადრი ესებუა დაკითხეს. ბრალდებულმა დაცვისა და ბრალდების მხარის კითხვებს უპასუხა. ესებუა წარდგენილ ბრალდებაში თავს უდანაშაულოდ მიიჩნევს და აცხადებს, რომ მას ბანკის ყაჩაღობის საქმესთან კავშირი არ აქვს.
ესებუამ გაიხსენა 2020 წლის 21 ოქტომბერი და ის ლოკაციები სადაც იმ დღეს და მომდევნო დღეებში იმყოფებოდა. რაც შეეხება მის მიმალვაში ყოფნას, ამტკიცებს რომ არ ენდობოდა პოლიციას, გრძნობდა საფრთხეს, რადგან ადრეც ავიწროებდნენ სამართალდამცავები და მათთვის იყო „სასურველი კანდიდატი“. მისი თქმით, ამ დროის მანძილზე იმყოფებოდა აფხაზეთშიც, თუმცა ქვეყანა არ დაუტოვებია.
ესებუა, რომელსაც დაკავების დროს აღმოჩენილი უკანონო იარაღის ფლობისთვის 4 წელი აქვს მისჯილი, ზუგდიდში „საქართველოს ბანკზე” თავდასხმას ამ დრომდე არ აღიარებს.
გამოძიება საქართველოს სისხლის სამართლის კოდექსის 236-ე, 323-ე და 329-ე მუხლებით მიმდინარეობს, რაც ტერორისტულ აქტს, მძევლად ხელში ჩაგდებას ტერორისტული მიზნით და ცეცხლსასროლი იარაღის უკანონოდ შეძენა-შენახვა-ტარებას გულისხმობს.