აშშ-ის ყოფილმა პრეზიდენტმა, ბარაკ ობამამ უკრაინის მთავრობის აღშფოთება გამოიწვია მას შემდეგ, რაც განაცხადა, რომ ადგილობრივმა „სიმპათიამ“ რუსეთის მიმართ დასავლეთის უფრო მკაცრი პასუხი დაბლოკა მოსკოვის მიერ ყირიმის ანექსიის დროს. ინფორმაციას ამის შესახებ ბრიტანული გამოცემა The Telegraph-ი ავრცელებს.
ბარაკ ობამას თქმით, უფრო ძლიერი ეროვნული იდენტობა უკრაინაში მხოლოდ 2014 წლის შემდეგ ჩამოყალიბდა და რომ მანამდე ბევრი მიესალმა რუსეთის ინტერვენციას.
„არსებობს მიზეზი, რის გამოც 2014 წელს ყირიმში შეიარაღებული შეჭრა არ მომხდარა, რადგან ყირიმი სავსე იყო რუსულენოვანი მოსახლეობით და იყო გარკვეული სიმპათია იმ შეხედულებების მიმართ, რომელსაც რუსეთი წარმოადგენდა“, – განაცხადა ობამამ, რომელიც კრიზისის დროს აშშ-ის პრეზიდენტი იყო.
ობამამ ასევე განაცხადა, რომ მან ყველაფერი გააკეთა, რაც შეეძლო 2014 წელს მკაცრი საერთაშორისო პასუხის გასატარებლად და აიძულა ევროპული ქვეყნები, დაეწესებინათ სანქციები.
უკრაინის პრეზიდენტის მრჩეველმა, მიხაილო პოდოლიაკმა გააკრიტიკა ობამა იმის გამო, რომ მან არ აღიარა ის, რომ დასავლეთის სისუსტემ გაათამამა პუტინი.