ალექსანდრ ლუკაშენკომ, ვლადიმერ პუტინთან შეთანხმებით, ევგენი პრიგოჟინთან მოლაპარაკებები გამართა. როგორც რუსული მედია წერს, ამის შესახებ ბელარუსის პრეზიდენტის პრესსამსახური იუწყება.
მათივე ცნობით, მოლაპარაკებები მთელი დღის განმავლობაში მიმდინარეობდა, რის შედეგადაც რუსეთის ტერიტორიაზე სისხლიანი დაპირისპირების დაუშვებლობაზე შეთანხმდნენ.
როგორც პრესსამსახურში განმარტავენ, პროგოჟინმა რუსეთის ტერიტორიაზე „ვაგნერის“ კოლონის გადაადგილების შეჩერების გადაწყვეტილება მიიღო.
შეიარაღებული ფორმირება „ვაგნერის“ ხელმძღვანელმა, ევგენი პრიგოჟინმა რუსეთის შეიარაღებული ძალები „ვაგნერის“ ბანაკებზე სარაკეტო თავდასხმაში დაადანაშაულა. პრიგოჟინის თქმით, რუსეთის თავდაცვის სამინისტრომ მოატყუა „ვაგნერის“ დაჯგუფება და პირობა დადო, რომ უპასუხებს ამ სისასტიკეს. ის თავდაცვის მინისტრ სერგეი შოიგუსა და გენშტაბის უფროსის, ვალერი გერასიმოვის გადაყენებას ითხოვს.
რუსეთის თავდაცვის უწყებაში უარყვეს პრიგოჟინის განცხადება და აღნიშნეს, რომ გავრცელებული ინფორმაცია არ შეესაბამება რეალობას და წარმოადგენს საინფორმაციო პროვოკაციას. რუსეთის უსაფრთხოების ფედერალურმა სამსახურმა „ვაგნერის“ დაჯგუფების ხელმძღვანელის, ევგენი პრიგოჟინის წინააღმდეგ სისხლის სამართლის საქმე აღძრა ამბოხისკენ მოწოდების მუხლით. ვლადიმირ პუტინმა პრიგოჟინის ქმედებებს ღალატი უწოდა და ამბოხის ორგანიზატორების ნეიტრალიზების ბრძანება გასცა.