ამერიკული სპეცსამსახურები მიიჩნევენ, რომ არმიის გენერალმა, საჰაერო-კოსმოსური ძალების მეთაურმა სერგეი სუროვიკინმა იცოდა, რომ შეიარაღებული ფორმირება „ვაგნერის“ ხელმძღვანელი ევგენი პრიგოჟინი ამბოხს გეგმავდა. ამის შესახებ სადაზვერვო მონაცემებზე წვდომის მქონე რამდენიმე წყაროზე დაყრდნობით გამოცემა The New York Times-ი წერს.
როგორც გამოცემის წყაროები ამბობენ, ახლა ამერიკული დაზვერვა იმის გარკვევას ცდილობს, მონაწილეობდა თუ არა სუროვიკინი ამბოხის გეგმის შემუშავებაში.
NYT-ის წყაროების ინფორმაციით, არსებობს იმის ნიშნები, რომ თავდაცვის სამინისტროს ხელმძღვანელობის შეცვლის მცდელობაში პრიგოჟინს შესაძლოა სხვა გენერლებიც უჭერდნენ მხარს. რესპონდენტები აცხადებენ, რომ პრიგოჟინი არ დაიწყებდა ამბოხს, თუ არ იქნებოდა დარწმუნებული, რომ მას მაღალ თანამდებობებზე თანამოაზრეები ჰყავს.
ამერიკელი მაღალჩინოსნების თქმით, გენერალ სუროვიკინისა და პრიგოჟინის კავშირი შესაძლოა იყოს იმის მიზეზი, რის გამოც „ვაგნერის“ ხელმძღვანელი ჯერ კიდევ ცოცხალია.
23 ივნისს შეიარაღებული ფორმირება „ვაგნერის“ ხელმძღვანელმა ევგენი პრიგოჟინმა რუსი სამხედროები „ვაგნერის“ ბანაკებზე სარაკეტო დარტყმაში დაადანაშაულა. პრიგოჟინმა განაცხადა, რომ თავის მებრძოლებთან ერთად მოსკოვში ჩავა და თავდაცვის სამინისტროს ხელმძღვანელობას პასუხს მოსთხოვს. ამის შემდეგ მის წინააღმდეგ შეიარაღებული ამბოხის ორგანიზების ფაქტზე გამოძიება დაიწყო. 24 ივნისს ბელარუსის პრეზიდენტთან საუბრის შემდეგ პრიგოჟინმა განაცხადა, რომ მებრძოლებს უკან, ლუგანსკის ოლქში აბრუნებს.