ადამიანის უფლებათა ევროპულმა სასამართლომ არ მიიღო წარმოებაში საქართველოს ექსპრეზიდენტის მიხეილ სააკაშვილის სარჩელი უკრაინის წინააღმდეგ, რომელშიც სააკაშვილი მისთვის უკრაინის მოქალაქეობის ჩამორთმევისა და ქვეყნიდან გაძევების გამო საკუთარი უფლებების დარღვევის აღიარებას ითხოვდა. სასამართლოს გადაწყვეტილების შესახებ „უკრაინსკაია პრავდა“ წერს.
საუბარია 2017-2018 წლების მოვლენებზე, როდესაც სააკაშვილს უკრაინის მოქალაქეობა ჩამოართვეს, მის წინააღმდეგ სისხლის სამართლის საქმე აღძრეს, დააკავეს და ქვეყნიდან გააძევეს. სააკაშვილი აცხადებდა, რომ მის წინააღმდეგ დაირღვა ევროპული კონვენციის რამდენიმე მუხლი, კერძოდ კი: მუხლი 3 (არაადამიანური ან ღირსების შემლახავი მოპყრობის აკრძალვა), 5§1 (თავისუფლებისა და პირადი ხელშეუხებლობის უფლება), 6§2 (უდანაშაულობის პრეზუმფცია), 8 (პირადი და ოჯახური ცხოვრების დაცულობის უფლება), 11 (შეკრების თავისუფლება), 13 (სამართლებრივი დაცვის ქმედითი საშუალების უფლება) და 18 (უფლებების შეზღუდვათა გამოყენების ფარგლები).
ერთის გარდა ყველა პრეტენზიაზე სასამართლომ დაადგინა, რომ სააკაშვილმა არ გამოიყენა ეროვნულ დონეზე მისთვის ხელმისაწვდომი იურიდიული დაცვის ყველა საშუალება, ხოლო მე-13 მუხლთან დაკავშირებით მისი განცხადება უსაფუძვლოდ მიიჩნია.
სასამართლომ ასევე აღნიშნა, რომ 2019 წლის მაისის შემდეგ, როდესაც სააკაშვილს უკრაინის მოქალაქეობა დაუბრუნეს და მან პოლიტიკური საქმიანობა განაახლა, მას არაფერი უშლიდა ხელს იმაში, რომ საჩივრები უკრაინაში წარმოედგინა.