უკრაინის საგარეო საქმეთა მინისტრმა, დმიტრო კულებამ მოუწოდა გერმანიის ხელისუფლებას, არ გაიმეორონ ყოფილი კანცლერის, ანგელა მერკელის შეცდომა და არ შეეწინააღმდეგონ ნატოში უკრაინის გაწევრიანებას. ამის შესახებ კულებამ Bild-თან ინტერვიუში ისაუბრა.
„არ გაიმეოროთ კანცლერ მერკელის შეცდომა, რომელიც მან 2008 წლის ბუქარესტში დაუშვა, როდესაც ეწინააღმდეგებოდა ნებისმიერ პროგრესს უკრაინის ნატოში გაწევრიანების გზაზე. ალიანსის მაშინდელმა გადაწყვეტილებამ კარი გაუღო პუტინს საქართველოში შეჭრისთვის და ყირიმის უკანონო ანექსიისთვის. 2014 წელს რომ უკრაინა ნატოს წევრი ყოფილიყო, ყირიმის ანექსია, ომი დონბასში და მთელ უკრაინაში რუსეთის შეჭრა არ მოხდებოდა“, – აცხადებს კულება.
მიუხედავად ამისა, კულება ამბობს, რომ კიევი ომის მიმდინარეობისას ნატოში მიღებას არ ელოდება, თუმცა აღნიშნავს, რომ ომის შემდეგ უკრაინის ნატოში არ მიღება ევროპისთვის თვითმკვლელობა იქნებოდა.