“ჩინეთის მოქალაქეებისთვის უვიზო რეჟიმის დაწესება ინვესტიციებისთვის არის მნიშვნელოვანი”

საქართველოს პარლამენტის თავმჯდომარე შალვა პაპუაშვილი საქართველოს მიერ ჩინეთის მოქალაქეებისთვის უვიზო რეჟიმის დადგენას გამოეხმაურა.

„ეს [უვიზო რეჟიმი ჩინეთის მოქალაქეებისთვის] შესაძლებლობებს ზრდის ტურიზმის განვითარების კუთხით. იცით, რომ ჩინეთიდან საზღვარგარეთ გამავალი ტურისტების რაოდენობა საკმაოდ დიდია და ზოგადად, პოპულარულია ტურიზმი ჩინეთში და მნიშვნელოვანია, რომ ეს სეგმენტიც მოიზიდოს საქართველომ და როგორც თავისუფალი რეჟიმი, ისე პირდაპირი ფრენები ამას ხელს შეუწყობს. გარდა ამისა, მათ შორის ინვესტიციებისთვის არის მნიშვნელოვანი. რაც შეეხება სხვა კონტექსტში ამის ჩასმას, არ მგონია, რომ ეს რამენაირად რელევანტური იყოს. თუნდაც ევროპასთან ინტეგრაციის მხრივ, მნიშვნელოვანია ქართული ეკონომიკის სიძლიერე. სუსტი ეკონომიკა და სუსტი ქვეყანა არავის სჭირდება ევროკავშირში“, – განაცხადა პაპუაშვილმა.