უკრაინელების უმეტესობა მიიჩნევს, რომ პრეზიდენტი ვოლოდიმირ ზელენსკი უშუალოდ არის პასუხისმგებელი მთავრობასა და სამხედრო ადმინისტრაციებში კორუფციაზე. ინფორმაციას ამის შესახებ უკრაინული მედია ილკო კუჩერივას სახელობის „დემოკრატიული ინიციატივების“ ფონდისა და კიევის სოციოლოგიის საერთაშორისო ინსტიტუტის მიერ ერთობლივად ჩატარებულ გამოკითხვაზე დაყრდნობით ავრცელებს.
გამოკითხვის შედეგების თანახმად, 2023 წლის ივლისის დასაწყისისთვის, გამოკითხულთა 78% მიიჩნევდა, რომ უკრაინის პრეზიდენტი უშუალოდ პასუხისმგებელია კორუფციაზე მთავრობასა და სამხედრო ადმინისტრაციებში. აღსანიშნავია, რომ გამოკითხულთა მხოლოდ 18% არ ეთანხმება აღნიშნულ მტკიცებას.
გამოკითხვა ასევე ცხადყოფს, რომ ხანდაზმული უკრაინელები უფრო მომთხოვნი არიან სახელმწიფოს მეთაურის მიმართ, ვიდრე ახალგაზრდები. კერძოდ,18-29 წლის გამოკითხულთა შორის 70% ეთანხმება თეზისს, რომ კორუფციაზე პასუხისმგებელი სახელმწიფოს მეთაურია, ხოლო 60+ ასაკის ადამიანებში კრიტიკულად განწყობილთა წილი 81%-მდე იზრდება.
გამოკითხვა 2023 წლის 3 ივლისიდან 17 ივლისამდე პერიოდში ჩატარდა უკრაინის ყველა რეგიონში, გარდა ყირიმის ავტონომიური რესპუბლიკისა, დონეცკის, ლუგანსკისა და ხერსონის ოლქებისა.
„დემოკრატიული ინიციატივების“ ფონდი 1992 წელს დაარსდა, როგორც საზოგადოებრივი ორგანიზაცია, რომელიც მხარს უჭერს უკრაინის ნატოში გაწევრიანებას. 1998 წლიდან „დემოკრატიული ინიციატივების“ ფონდი უკრაინაში ეგზიტპოლების ჩატარებაში მონაწილეობს.