1990-1991 წლებში საქართველოს რესპუბლიკის უზენაესი საბჭოს წევრი ველოდი მირცხულავა 88 წლის ასაკში გარდაიცვალა. ველოდი მირცხულავას ხელი აქვს მოწერილი საქართველოს სახელმწიფოებრივი დამოუკიდებლობის აღდგენის აქტზე.
სამწუხარო ინფორმაციას სოციალურ ქსელში ზუგდიდის მაჟორიტარი დეპუტატი მაია კალანდია ავრცელებს:
„უანგაროდ, მთელი გულით ემსახურა თავის ქვეყანას. ერგო წილად ბედნიერება, ხელი მოეწერა საქართველოს დამოუკიდებლობის აქტისთვის და ბოლო ამოსუნთქვამდე ქვეყნის დარდით ცხოვრობდა – ველოდი მირცხულავა!
სანამ შეეძლო ფეხზე დგომა, ყველა მიტინგზე შეხვდებოდით, ყველგან რუსეთსა და ოკუპანტს, აქ კი მათ დამქაშებს აგინებდა.
ქვეყანამ გაიცნო წლების წინ გავრცელებული ვიდეოთი, როდესაც სიტყვაწართმეული, გულგამსკდარი პატრიოტები ჩუმად დადიოდნენ და მათი ხმა არსად არ ისმოდა.
პირველ თოვლზეა სიუჟეტი, ქუჩაში გამოსულ ომის ბავშვს რომ ეკითხება ჟურნალისტი, როგორ მოგწონს თოვლიო და ამ დროს კამერაში შემოდის ბატონი ველოდი, რომელიც ცდილობს დაითანხმოს ჟურნალისტი, რომ იმ უბედურების შემოქმედი, რაც ქვეყანაში ტრიალებს, შევარდნაძეა და თითოეული ჩვენგანის გულისტკივილი ჩაატანა იმ ცნობილ გინებაში!
შორს დარჩა საყვარელი გულირიფშის კიპაროსები და თავისი სახლიდან გამოძევებულ პატრიოტს, თბილისის მიწა მიიბარებს! მსუბუქი იყოს…“ – წერს მაია კალანდია.
საინფორმაციო სააგენტო “ექსკლუზივ ნიუსი” სამძიმარს უცხადებს გარდაცვლილის ოჯახს.