ჩეხეთის თავდაცვის მინისტრმა, იანა ჩერნოხოვამ განაცხადა, რომ თუ უკრაინა და პოლონეთი არ შერიგდებიან, ჩვენ ყველანი წავაგებთ.
“[პოლონელები] ამაყი, მებრძოლი და მამაცი ხალხი, რომლებიც არავის აძლევენ მათთვის ყვირილისა და ბრძანების უფლებას. ეს დადასტურებულია ისტორიით. პოლონეთის მისამართით უკრაინის პრეზიდენტის განცხადება, ბოდიში, მაგრამ ძალიან სამწუხაროა”, – აღნიშნა მან.
გაეროს გენერალურ ასამბლეაზე სიტყვით გამოსვლისას ზელენსკიმ განაცხადა, რომ “ზოგიერთი ჩვენი მეგობარი ევროპაში სოლიდარობას თამაშობს პოლიტიკურ თეატრში და მარცვლეულის მიწოდებას თრილერად აქცევს, ისინი ეხმარებიან მოსკოველი მსახიობისთვის სცენის მომზადებაში”.
ჩეხეთის თავდაცვის მინისტრის თქმით, მხარეებმა სიამაყე გვერდზე უნდა გადადონ, მოლაპარაკების მაგიდასთან დასხდნენ, ბოდიში მოიხადონ, ამოისუნთქონ და გააგრძელონ წინსვლა.
“ეს უნდა მოხდეს მალე და ორივე მხარეს ვთხოვ ამის გაკეთებას. თუ ეს არ მოხდა, ჩვენ ყველანი წავაგებთ”, – დასძინა მან.