მწვავე განცხადებებს ძალიან ხშირად ვისმენთ და ბევრი შეურაცხყოფაც მოგვისმენია და ამას ასეთი ამბავი არ მოჰყოლია. გამოვრიცხავ პოლიტიკურ ანგარიშსწორებას, – ამის შესახებ საკრებულოს ფრაქცია „ქართული ოცნება – დემოკრატიული საქართველოს“ თავმჯდომარე ოთარ გრიგოლიამ განაცხადა, რითაც გუშინ გლდანში მომხდარ შემთხვევას გამოეხმაურა.
„ძალიან ცუდი ფაქტი მოხდა, მე მინდა ჯანმრთელობა ვუსურვო ირაკლი ეძგვერაძეს და იმ ადამიანებს, რომლებიც იქ იყვნენ. თავისთავად ცხადია, პოლიცია ჩართულია ამაში, მიმდინარეობს გამოძიება და ყველაფერი დადგინდება. იყო სიტყვიერი დაპირისპირება, თუმცა ეს ძალიან ხშირად ხდება საკრებულოში და ასეთ რამეს, გაგრძელების სახით ადგილი არ ჰქონია. აბსურდულია ამაზე პირდაპირ ისრების გადმოტანა, იმიტომ რომ მწვავე განცხადებებს ძალიან ხშირად ვისმენთ და ბევრი შეურაცხყოფაც მოგვისმენია და ამას ასეთი ამბავი არ მოჰყოლია. გამოვრიცხავ პოლიტიკურ ანგარიშსწორებას, ვიცნობ კოტე ზარნაძეს და გამორიცხულია მისი მონაწილეობა ამ პროცესში“, – აცხადებს ოთარ გრიგოლია.
თბილისის საკრებულოს „ნაციონალური მოძრაობის“ დეპუტატზე, ირაკლი ეძგვერაძეზე და მის თანმხლებ პირებზე თავდასხმის საქმეზე პოლიციამ 6 ადამიანი დააკავა.