ეროვნული ბანკის პირველი ვიცე-პრეზიდენტი და პრეზიდენტის მოვალეობის შემსრულებელი ნათია თურნავა საქართველოს პრეზიდენტის, სალომე ზურაბიშვილის განცხადებას გამოეხმაურა. საუბარია გადაწყვეტილებაზე, რომლის თანახმად, პრეზიდენტი ოთარ ფარცხალაძისთვის მოქალაქეობის შეწყვეტას მიზანშეწონილად არ მიიჩნევს.
როგორც თურნავამ საზოგადოებრივი მაუწყებლის ეთერში განაცხადა, ოთარ ფარცხალაძეს ირგვლივ განვითარებული მოვლენები პოლიტიკის სფეროს მიეკუთვნება და თავს იკავებს პოლიტიკური გადაწყვეტილებების შეფასებისგან.
„მე წარმოვადგენ ეროვნულ ბანკს, ეროვნული ბანკი არის აპოლიტიკური უწყება, რომელმაც თავისი გადაწყვეტილებები უნდა მიიღოს მიუხედავად პოლიტიკური კონიექტურისა. აქედან გამომდინარე, ჩემი მანდატის გათვალისწინებით თავს ნამდვილად ვერ მივცემ უფლებას, რომ გავაკრიტიკო პრეზიდენტი, არა იმიტომ რომ ჩემი შეხედულება არ მაქვს ამ დღეებში განვითარებულ მოვლენებზე, არამედ პატივს ვცემ პრეზიდენტის ინსტიტუტს.
არც თუ ისე თანმიმდევრული მოვლენები, რაც ფარცხალაძესთან დაკავშირებით განვითარდა ეს უკვე პოლიტიკის სფეროს მიეკუთვნება. ქვეყნის პრეზიდენტი არის პოლიტიკოსი, მოქმედებს თავისი პოლიტიკური მოსაზრებებით და მე არ მაქვს უფლება, შევიდე პოლიტიკური გადაწყვეტილებების და მოტივაციების გარჩევაში. ისევ და ისევ პატივს ვცემ პრეზიდენტის ინსტიტუტს, მაგრამ ჩვენი ინსტიტუტის, ეროვნული ბანკის მიმართაც, რა თქმა უნდა, ასეთივე პატივისცემას ვითხოვთ“-განაცხადა ნათია თურნავამ.