“სამწუხაროა, რომ პრეზიდენტი კერძო ვიზიტებს ახორციელებს, ეს არის კონსტიტუციის დარღვევა”

სამწუხაროა, რომ პრეზიდენტი კერძო ვიზიტებს ახორციელებს. ეს არის კონსტიტუციის დარღვევა, – ასე შეაფასა „ხალხის ძალის“ ერთ-ერთმა ლიდერმა, დეპუტატმა დიმიტრი ხუნდაძემ პრეზიდენტ სალომე ზურაბიშვილის ვიზიტები ესტონეთში, ლატვიასა და ლიეტუვაში.

„სამწუხაროა, რომ პრეზიდენტი კერძო ვიზიტებს ახორციელებს. ეს არის კონსტიტუციის დარღვევა. ვფიქრობ, ის უნდა იყოს კონსტიტუციის დაცვის უმთავრესი გარანტი. ასეთი ნაბიჯები კატეგორიულად მიუღებელია და ამიტომ იყო სამართლებრივი რეაქცია პარლამენტის მხრიდან. ამას საკონსტიტუციო სასამართლო განიხილავს და მისი პასუხის მიხედვით იქნება შეფასებებიც და ქმედებებიც“, – აცხადებს ხუნდაძე.

საკონსტიტუციო სასამართლოში პრეზიდენტის იმპიჩმენტის თაობაზე არსებითი განხილვა ზეპირი მოსმენით 3 ოქტომბერს, წარდგინების ავტორთა და საქართველოს პრეზიდენტის მონაწილეობით გაიმართება.