ჩვენ ასეულობით და ათასეულობით მაგალითი ვიცით იმისა, რომ ვინც მაშინდელ ავტორიტარულ ხელისუფლებას დაუპირისპირდა, ბევრი მათგანი ფიზიკურად იყო ლიკვიდირებული, განადგურებული. ასეულობით ადამიანია პირდაპირ მოკლული, ათასობით ადამიანმა დაკარგა საკუთარი ქონება, – ამის შესახებ საქართველოს პრემიერ-მინისტრმა, ირაკლი ღარიბაშვილმა „იმედის კვირას“ ექსკლუზიურ ინტერვიუში განუცხადა.
მან ის პერიოდი გაიხსენა, როდესაც „ქართული ოცნება“ ხელისუფლებაში მოვიდა. კერძოდ, პრემიერმა 11 წლის წინანდელი მოვლენები შეაფასა და 1 ოქტომბრის ისტორიული გამარჯვებით გამოწვეულ ემოციაზე ისაუბრა.
„მახსოვს, მეორე დღეს თითქოს, სხვა ქვეყანაში გავიღვიძეთ. რატომ? იმიტომ, რომ მე პირადად, თავისუფლება ვიგრძენი. ასეთი განცდა მქონდა, რომ თავისუფალ ქვეყანაში დავდიოდი. არ იგრძნობოდა დაძაბულობა, წნეხი და ტერორი და ეს ბოროტება დამთავრდა, გაიმარჯვა სიკეთემ!“, – აღნიშნა ღარიბაშვილმა.
მისივე თქმით, სააკაშვილის მმართველობის პერიოდი მოსახლეობისთვის ურთულესი იყო.
„ყოველგვარი გადაჭარბების გარეშე უნდა ითქვას, რომ ნამდვილად, ადამიანები იბრძოდნენ ფიზიკური გადარჩენისთვის. ჩვენ ასეულობით და ათასეულობით მაგალითი ვიცით იმისა, რომ ვინც მაშინდელ ავტორიტარულ ხელისუფლებას დაუპირისპირდა, ბევრი მათგანი ფიზიკურად იყო ლიკვიდირებული, განადგურებული. ასეულობით ადამიანია პირდაპირ მოკლული, ათასობით ადამიანმა დაკარგა საკუთარი ქონება, სახლები, რომ იტყვიან, ადამიანები გაუბედურდნენ. ოჯახები დაინგრა და ძალიან ბევრ ოჯახში ტრაგედია დატრიალდა. ეს ყველამ კარგად ვიცით“, – განაცხადა ღარიბაშვილმა.
პრემიერმა ასევე ისაუბრა იმ უსამართლობის განცდაზეც, რომელიც სააკაშვილის პერიოდში მოსახლეობას გააჩნდა.
„თითქმის, ვერც ერთი ადამიანი საქართველოში სამართალს ვერ პოულობდა. აზრი არ ჰქონდა სასამართლოში წასვლას. მახსოვს, ჩემი ოჯახის წევრის სასამართლო პროცესს ვესწრებოდი და იმდენად დამთრგუნველი იყო ამ უსამართლობის ყურება, როდესაც იცი, რომ მართალი ხარ და შენს სიმართლეს ვერ ამტკიცებ. ამაზე საშინელება არ არსებობს, როდესაც ადამიანი ყოველ ფეხის ნაბიჯზე ეჯახებოდი უსამართლობასა და ჩაგვრას“, – აღნიშნა პრემიერმა.