ესტონეთის თავდაცვის მინისტრის, ჰანო პევკურის განცხადებით, ამჟამად უცნობია, ზუსტად რამდენი ესტონელი მოხალისე იბრვის რუსეთის წინააღმდეგ საერთაშორისო ლეგიონის ან უკრაინის შეიარაღებული ძალების რიგებში.
ორშაბათს, 2 ოქტომბერს, ესტონეთის ტელევიზიის საინფორმაციო და ანალიტიკურ გადაცემა „რინგვაადე“-ში საუბრისას, მინისტრმა აღნიშნა, რომ ეს, უპირველესად, იმით არის განპირობებული, რომ შეიცვალა უკრაინის მიდგომა უცხოელი მოხალისეების სამხედრო სამსახურის გავლის მიმართ.
ჰანო პევკურმა განაცხადა: „თუ ადრე უკრაინის თავდაცვის ძალებში არსებობდა მეტ-ნაკლებად მკაფიო წესი იმის შესახებ, თუ როგორ უნდა დარეგისტრირდნენ უცხოელი მებრძოლები და რომელ ქვედანაყოფებში იმსახურონ, დღეს უკრაინამ რადიკალურად შეცვალა მიდგომა და უცხოელ მოხალისეებს, ფაქტობრივად, ყველა ქვედანაყოფში შეუძლიათ სამსახურის გავლა“.
ორშაბათს ესტონეთის თავდაცვის მინისტრი კიევში იმყოფებოდა, სადაც უკრაინის ლიდერს, ვლადიმირ ზელენსკის შეხვდა.
„არავის არ აქვს თანდაყოლილი ვალდებულება, რომ თავისი ქმედებების შესახებ მოგვაწოდოს ინფორმაცია“, – ამბობს პევკური.
„თუ ვინმე შეგვატყობინებს ამის შესახებ, მაშინ ჩვენ გვექნება შესაბამისი ინფორმაცია, მაგრამ ამ დრომდე არავინ დაკავშირებია [ესტონეთის] საელჩოს უკრაინაში ან [ესტონეთის] თავდაცვის სამინისტროს, რათა ეთქვა, რომ ის უკრაინისთვის საბრძოლველად წავიდა“, – დასძინა ესტონეთის თავდაცვის მინისტრმა.
მისივე განცხადებით, საერთაშორისო თანამეგობრობის მხარდაჭერა და სამხედრო დახმარება ზელენსკისა და მთლიანად, უკრაინისთვის კვლავ მეტად მნიშვნელოვანია.
ამ დღეებში გავრცელებული ინფორმაციის თანახმად, ტანელ კრიგული, რომელიც ადრე ესტონეთის თავდაცვის ძალების სადაზვერვო ბატალიონში მსახურობდა და ნებაყოფლობით შეუერთდა საერთაშორისო ლეგიონ „უკრაინას“, დონეცკის ოლქის ქალაქ ლიმანთან ახლოს, რუსული ავიადარტყმების შედეგად დაიღუპა.
2022 წლის თებერვალში უკრაინაში რუსეთის შეჭრის შემდეგ, ეს უკვე ესტონეთის მოქალაქეების ბრძოლაში დაღუპვის მეორე შემთხვევაა.
კრიგულის სიკვდილამდე რამდენიმე თვით ადრე, მიმდინარე წლის დასაწყისში, ბახმუტთან (დონეცკის ოლქი) ბროლაში, ესტონეთის არმიის ყოფილი ოფიცერი, ივო იურაკი დაიღუპა.