სუსში მიმდინარე გამოძიების ფარგლებში „კანვას – საქართველოს“ დირექტორი იკითხება. გიორგი მელაძე სასამართლოს წინაშე ტრენინგთან დაკავშირებით აკეთებს განმარტებას. პარალელურად სასამართლოსთან მისი მხარდასაჭერი აქცია მიმდინარეობს.
„ამ ყველაფრის რეალური ამოცანა რა არის, რომ როდესაც გაბრაზებულია 5 ადამიანი, ამ 5-მა ადამიანმა სცადოს ერთმანეთში მოილაპარაკოს ისეთ მშვიდობიან გზაზე, რაც არავის დააზარალებს. თუ კანონის ფარგლებს მიღმა გასულ მთავრობას არ მოეწონება მათი ქცევა, მათი აზრი, მათი ნებისმიერი პროექტი, ისინი მაშინვე შეიძლება გახდნენ სამიზნე და ამისთვის უნდა მოემზადონ. მე მზად ვიყავი ნამდვილად იმისთვის, რომ რაღაც დროს დაიწყებდნენ ამ ყველაფრის სასამართლო ინსტანციებში თრევას“, – აღნიშნა მელაძემ.
18 სექტემბერს სახელმწიფო უსაფრთხოების სამსახურმა გაავრცელა განცხადება, სადაც ნათქვამი იყო, რომ გარკვეული პირები საქართველოში სამოქალაქო არეულობას გეგმავენ, რომლის მიზანია, ხელისუფლების ძალადობრივი გზით შეცვლა და „ევრომაიდნის“ მოწყობა. კერძოდ, დესტრუქციული პროცესების დაწყების პერიოდად ოქტომბერ-დეკემბრი სახელდება, მთავარი შემსრულებლები კი გიორგი ლორთქიფანიძე, მიხეილ ბატურინი და მამუკა მამულაშვილი არიან. გეგმის განხორციელება უცხო ქვეყნების კოორდინაციითა და ფინანსური მხარდაჭერით არის დაგეგმილი.
მოგვიანებით, სახელმწიფო უსაფრთხოების სამსახურში სამოქალაქო არეულობის სავარაუდო დაგეგმვის საქმესთან დაკავშირებით მიმდინარე გამოძიების ფარგლებში, ჯგუფ „კანვასის“ სამი წევრი, სერბეთის მოქალაქეები გამოკითხეს. გამოძიების ფარგლებში ასევე გამოიკითხა „კანვას – საქართველოს“ ერთ-ერთი დამფუძნებელი ნინო გოგიბერიძე.