ისრაელში მცხოვრები, მიშა ბარამაშვილი აცხადებს, რომ ისრაელის საზღვრისპირა ქალაქებში ტერორისტები დარბიან მანქანებით და უმისამართოდ ისვრიან.
ამის შესახებ მან „ქრონიკასთან“ სატელეფონო ჩართვისას განაცხადა.
„ისრაელის ცენტრალურ ქალაქებში, ჩვენთან უფრო სიმშვიდეა და საზღვრისპირა ქალაქებში, როგორიც არის აშდოტი, ლოდი, შდეროტი – იქ არის ძალიან დიდი ამბავი. ეპიცენტრი შდეროტშია. შემოსული არიან ტერორისტები, დარბიან მანქანებით, ისვრიან უმისამართოდ. ხოცავენ მოქალაქეებს, ფანჯრებში ისვრიან. ამას გარდა, 2200 რაკეტა უკვე ისროლეს.
აქეთ, შედარებით სიმშვიდეა, რადგან ჩვენ საზღვრისგან მოშორებით ვართ. აქაც ირთვება ხმოვანი სიგნალები, აქეთაც მოფრინავს ბომბები და „რკინის გუმბათი“ ანეიტრალებს. ძალიან მცირეა იმის ალბათობა, რომ აქ ბომბი ჩამოვარდეს. საკმაოდ მობილიზებულია მთავრობა იმისთვის, რომ ჩვენი უსაფრთხოება 100%-ით იყოს გარანტირებული“, – განაცხადა მიშა ბარამაშვილმა.
სარაკეტო დარტყმა ისრაელზე ადგილობრივი დროით 6:30 საათზე განხორციელდა. შედეგად დაიღუპა სულ მცირე 22, დაშავდა 545 ადამიანი. მომხდარზე პასუხისმგებლობა ტერორისტულმა ორგანიზაცია „ჰამასმა“ აიღო. ორგანიზაციაში ისრაელის წინააღმდეგ ახალი სამხედრო ოპერაციის დაწყების შესახებ განაცხადეს. ისრაელის თავდაცვის ძალებმა „ომისთვის მზადყოფნის მდგომარეობა“ გამოაცხადეს და ღაზას სექტორში „ჰამასის“ ობიექტებზე იერიში დაიწყეს.