შოტლანდიის პირველი მინისტრის, ჰამზა იუსაფის ცოლის თქმით, მისი მშობლები ღაზას სექტორში იმყოფებიან. ამის შესახებ ნადია ელ-ნაკლამ BBC-სთან ინტერვიუში განაცხადა.
მისი თქმით, მშობლები – ელიზაბეტ და მაგედ ელ-ნაკლა, რომლებიც დანდიში ცხოვრობენ, ღაზაში გასულ კვირას, ვაჟის და მაგედის 92 წლის ავადმყოფი დედის მოსანახულებლად ჩავიდნენ.
ელიზაბეტ და მაგედ ელ-ნაკლა
ოჯახი სექტორიდან გასვლას სამშაბათს აპირებდა, მაგრამ ღაზასა და ეგვიპტეს საზღვარი დაიბომბა და ახლა მათ გაქცევის საშუალება არ აქვთ, რადგან ისრაელმა ყველა გადასასვლელი ჩაკეტა.
„აბსოლუტურად შეშინებულები არიან იმის გამო რაც შეიძლება მომავალში მოხდეს და იმის გამო რაც ახდა ხდება. ძალიან მეშინია იმის გააზრება, რომ შეიძლება ისინი ვეღარასოდეს ვნახო“, – გააცხადა ნადია ელ-ნაკლამ.
მანამდე ელიზაბეტ ელ-ნაკლამ სოციალურ ქსელში მოკლე ვიდეო გამოაქვეყნა, რომელშიც ამბობს:
„არ გვაქვს ელექტროენერგია და წყალი. საჭმელი, რომელიც გვაქვს, დიდხანს ვერ გასტანს, იმიტომ რომ ელექტროენერგია არ გვაქვს და გაფუჭდება. ამ სახლში 4 შვილიშვილი მყავს – 2 თვის, 4 წლის და 9 წლის ტყუპი. მსოფლიოს ვთხოვთ, დაეხმაროს პალესტინელებს“.
„ცახალის“ წარმომადგენელმა ჯონათან კონრიკუსმა განაცხადა, რომ მისი ინფორმაციით, ახლა ოჯახი ღაზას სექტორიდან გასვლას ვერ მოახერხებს. „ჩემი აზრით ეს ძალიან ხანგრძლივი ომი იქნება. ჩვენი სამხედროების მიზანია „ჰამასს“ საბრძოლო საშუალება სრულად წავართვათ“, – განუცხადა მან BBC-ს შოტლანდიის ბიუროს.
„ჰამასის“ თავდასხმის შემდეგ, ისრაელმა ღაზას სექტორის სრული ბლოკირების გადაწყვეტილება მიიღო და სექტორში ელექტროენერგიის, საწვავის, საკვების, წყლისა და სხვა პროდუქტების შეტანა შეწყვიტა.