“ისრაელში მიმდინარეობს ომი, ომი ტერორიზმის წინააღმდეგ. ისრაელს მტკიცედ აქვს გადაწყვეტილი უზრუნველყოს მშვიდობა და უსაფრთხოება ჩვენს ტერიტორიაზე”, – ამის შესახებ საქართველოში ისრაელის ელჩმა, ჰადას მეიცადმა ჟურნალისტებს განუცხადა.
მისივე თქმით, ისრაელი ელოდება, რომ საერთაშორისო საზოგადოება დაგმობს ტერორიზმს, დაგმობს „ჰამასს“ და დადგება ისრაელის გვერდით.
„დარწმუნებული ვარ, საქართველოში ყველამ დაინახა და გაიგო იმ სისასტიკისა და საშინელებების შესახებ რაც მოხდა. ჩვენ ვნახეთ ის, რაც არავინ არასდროს უნდა ნახოს. დეტალებში შესვლა არ მინდა, მაგრამ დარწმუნებული ვარ, ის საფრთხე, რაც ჩვენს ხალხს ემუქრება აღმოიფხვრება. ტერორიზმის წინააღმდეგ ამ ომში დგახარ ისრაელის გვერდით, ან ტერორიზმის გვერდით, შუა გზა არ არსებობს. ძალიან ვაფასებ საქართველოს მხარდაჭერას, ოფიციალურ მხარდაჭერას, ინსტიტუციურ მხარდაჭერას. პრემიერმინისტრის, პრეზიდენტის, პარლამენტის თავმჯდომარის, ბევრი პარტიის ლიდერის, კერძო კომპანიების, ადამიანების განცხადებები, რომლებიც მხარდაჭერას გამოხატავენ და ეს ძალიან ამაღელვებელია, ვინაიდან ახლა ძალიან რთული დრო გვიდგას.
ისრაელი ელოდება, რომ მთელი საერთაშორისო საზოგადოება დაგმობს ტერორიზმს, დაგმობს „ჰამასს“, დადგება ისრაელის გვერდით, რადგან ჩვენ ვაკეთებთ იმას, რასაც უნდა ვაკეთებდეთ ჩვენი მოქალაქეებისა და სახელმწიფოს დასაცავად“, – აღნიშნა ელჩმა.