ჩვენ მივესალმებით ხაბეიშვილის დიდხანს დარჩენას თავმჯდომარის პოზიციაზე, – ამის შესახებ პარტია „ქართული ოცნების“ თავმჯდომარემ, პარლამენტო უმრავლესობის ლიდერმა, ირაკლი კობახიძემ ჟურნალისტებს განუცხადა.
კობახიძეს კითხვა დაუსვეს ლევან ხაბეიშვილის განცხადებაზე, რომელიც კვიპორსში კეზერაშვილთან შეხვედრის შემდეგ გააკეთა – „ნაციონალური მოძრაობის“ თავმჯდომარეობასთან დაკავშირებით არაფერი იცვლება.
„ხაბეიშვილს რაც შეეხება, ჩვენ მივესალმებით მის დიდხანს დარჩენას თავმჯდომარის პოზიციაზე. რაც შეეხება ზოგადად ოპოზიციას, კეზერაშვილის ფაქტორი, რა თქმა უნდა, ყველასთვის მნიშვნელოვანია, გამომდინარე იქიდან, რომ ის არის რადიკალური ოპოზიციის დამფინანსებელი, მთავარი დონორი და ეს არის ფაქტი. ახლა როგორც არ უნდა ისაუბრონ განსხვავებული ფორმით, ისინი მთლიანად დამოკიდებული არიან კეზერაშვილზე, ის თავის სისხლიან ფულს, კორუფციით ნაშოვნ ფულს აბანდებს ქართულ პოლიტიკაში, წარუმატებლად, მაგრამ ეს მაინც ასეა. შესაბამისად, საუბრები იმაზე, რომ ვიღაცას მოსწონს კეზერაშვილი და ვიღაცას – არა, არის ცარიელი ფარსი. ისინი იღებენ დაფინანსებას კეზერაშვილისგან“, – განაცხადა ირაკლი კობახიძემ.