2020 წლის ივლისში გარდაცვლილი ახალგაზრდა ქალის, თამარ ბაჩალიაშვილის საქმეზე ცრუ ჩვენებისთვის დაკავებული ყოფილი გამომძიებელი სერგო შუბითიძე თბილისის საქალაქო სასამართლომ პატიმრობიდან გაათავისუფლა. რადიო თავისუფლებას მისმა ადვოკატმა, დარეჯან ბუცხრიკიძემ უთხრა, რომ სასამართლომ 1-წლიანი პირობითი მსჯავრის შეფარდებაზე განაჩენი დაახლოებით 2 თვის წინ გამოაცხადა.
“კანონი ითვალისწინებდა გათავისუფლებას – ნაკლებად მძიმე დანაშაული იყო, პირი ნასამართლევი არ იყო, სამი შვილი ჰყავს, ოჯახის ძირითადი მარჩენალია და სასამართლომ სამართლიანობის პრინციპიდან გამომდინარე შეუფარდა პირობითი. არ იყო აუცილებელი პატიმრობა”, – ამბობს ადვოკატი.
თამარ ბაჩალიაშვილის საქმის ყოფილი გამომძიებელი სერგო შუბითიძე ცრუ ჩვენების მიცემის ბრალდებით 2025 წლის 25 ივნისს დააკავეს. პროკურატურის განცხადებით, სასამართლოში მოწმედ დაკითხვისას შუბითიძემ ერთ-ერთი ტელეკომპანიისთვის მიწოდებული ინფორმაცია გაიმეორა, რაც არაერთ ტყუილს შეიცავდა და მიზნად ისახავდა თამარ ბაჩალიაშვილის ოჯახის, საზოგადოების, საგამოძიებო უწყებისა და მართლმსაჯულების შეცდომაში შეყვანას.