დავით გარეჯის საქმეზე თბილისის საქალაქო სასამართლოში კრიზისების მართვის სამსახურის ყოფილი უფროსის, საქართველოს თავდაცვის ყოფილი მინისტრის, მინდია ჯანელიძის გამოკითხვა მიმდინარეობს.
ჯანელიძის თქმით, 2014 წელს ღარიბაშვილი და თავად შეხვდნენ კარტოგრაფებს, ასევე მამა კირიონს, რომლებმაც ღარიბაშვილთან გარეჯის პრობლემის საკითხზე ისაუბრეს. მისივე თქმით, მამა კირიონი ამბობდა, რომ 2007 წლის შემდეგ ჩიჩხიტურის და უდაბნოს მონასტერში ვეღარ გადადიოდნენ, ამ შეზღუდვას კი სადელიმიტაციო-სადემარკაციო კომისიის მუშაობას უკავშირებდა. მისივე თქმით, ღარიბაშვილმა მას საკითხის მოკვლევა დაავალა, თავად კი, თავის მოადგილეს, გიორგი სვანაძეს დაავალა ამ საქმის მოკვლევა.
დავით გარეჯის საქმეზე პროკურატურამ საგარეო საქმეთა სამინისტროს თანამშრომელი ივერი მელაშვილი და შს სამინისტროს თანამშრომელი ნატალია ილიჩოვა 2020 წლის 7 ოქტომბერს დააკავა. მათ ბრალად ედებათ საქართველოს ტერიტორიების წინააღმდეგ მიმართული ქმედება.