მერაბ ტურავამ საკონსტიტუციო სასამართლოსთან შეკრებილ ჟურნალისტებთან პრეზიდენტის იმპიჩმენტის საქმეზე 9 მოსამართლესთან ერთად ჩატარებულ თათბირზე განმარტება გააკეთა.
საკონსტიტუციო სასამართლოს თავმჯდომარემ დეტალებზე არ ისაუბრა – 9 მოსამართლეს შორის თუ არსებობს განსხვავებული აზრი საბოლოო გადაწყვეტილების მისაღებად. ტურავას თქმით, ეს თათბირის საიდუმლოა და მისი გამჟღავნების უფლება არ აქვს.
„არავითარი ზეწოლა არ ყოფილა. ამის შესახებ თქვენ ინფორმირებული იქნებოდით და ჩვენ ამას განვაცხადებთ. ჩვენ არ გვჭირდება არავითარი ზეწოლა, ზეწოლის გარეშეც ვიცით, რა გადაწყვეტილება უნდა მივიღოთ.
შევიკრიბეთ, ვითათბირეთ, ვიცით ერთმანეთის პოზიცია. თათბირის საიდუმლოებას ვერ გავამჟღავნებ, მაგრამ მას შემდეგ, რაც დოკუმენტს ხელი მოეწერება, ჩვენ შეგვიძლია. ჩვენ უნდა მივიღოთ გადაწყვეტილება, რომელიც სამართლებრივად დასაბუთებული იქნება.
ეს იყო ჩვეულებრივი სამართლებრივი დავა. შესაძლოა, თავისი მნიშვნელობით დიდია, მაგრამ სამართლებრივად გადასაწყვეტად ჩვენთან განსაკუთრებულ სირთულეებთან დაკავშირებული არ იყო. როგორიც უნდა ყოფილიყო გადაწყვეტილება, ისეთი მივიღეთ“, – განაცხადა ტურავამ.
საკონსტიტუციო სასამართლო პრეზიდენტის საიმპიჩმენტო წარდგინებაზე დასკვნას დღეს გამოაცხადებს.