სალომე ზურაბიშვილსა და მთლიანად კოლექტიურ „ნაცმოძრაობას“ შორის არის სრული კოორდინაცია, მათ ჰყავთ საერთო პატრონი, – ამის შესახებ პარტია „ქართული ოცნების“ თავმჯდომარემ, ირაკლი კობახიძემ განაცხადა.
როგორც ირაკლი კობახიძემ აღნიშნა, პრეზიდენტი უზრდელობს პარლამენტის წევრების მიმართ.
„არ მინდა დავემსგავსო სალომე ზურაბიშვილს, რომელმაც შეურაცხყოფა მიაყენა საკონსტიტუციო სასამართლოს, როგორც ინსტიტუტს, ეს წარმოუდგენელი იყო. პრეზიდენტი ჰქვია, ყველაფერს რომ თავი დავანებოთ, სირცხვილია ასეთი ტერმინები გამოიყენა. ეს უბრალოდ შემაშფოთებელია. იმაზე აღარაფერს ვამბობ, რომ პრეზიდენტი უზრდელობს პარლამენტის წევრების მიმართ, რაც გუშინ გააკეთა, ეს იყო ჩვეულებრივი უზრდელობა. პრეზიდენტი 70 წლის ქალია და უბრალოდ უზრდელობს. რაც შეეხება კოჭლ იხვს. იქვე დავაფიქსირე, რომ ეს იყო ამერიკული ტერმინოლოგია. პრეზიდენტს ბოლო წელს უწოდებენ კოჭლ იხვს, რომ გაგეგოთ კარგად, მიხვდებოდით, ეს უზრდელობა არ არის, მაგრამ რაც გუშინ სალომე ზურაბიშვილმა თქვა, ეს არის უზრდელობა. რეალურად, კიდევ ერთხელ გავიმეორებ, რომ სალომე ზურაბიშვილი და მთლიანად კოლექტიური „ნაცმოძრაობა“ ერთად დგამენ „ძლიერ სურათს“, რაც გაახმოვანა სალომე ზურაბიშვილმა. ეს არის საოცრება. თავად მოისაწყლოს თავი, მარტო დაჯდეს სხდომათა დარბაზში და „ნაცმოძრაობა“ უნდა გავიდეს გარეთ, რათა საწყალი სალომეს სურათი ერთად დადგან. აქ ხომ ჩანს, რამდენად ძლიერია კოორდინაცია სალომე ზურაბიშვილსა და მთლიანად კოლექტიურ „ნაცმოძრაობას“ შორის, მათ აქვთ სრული კოორდინაცია. რატომ? იმიტომ, რომ მათ ჰყავთ საერთო პატრონი. ეს არის მთავარი მიზეზი, რატომ აქვთ მათ ასეთი ძლიერი კოორდინაცია“, – განაცხადა ირაკლი კობახიძემ.