„ნაციონალური მოძრაობა“ გარდა იმისა, რომ ცდილობს ამ ქვეყანას ზიანი მიაყენოს, ეწევა თვითგანადგურების ძალიან აქტიურ კამპანიას, რაშიც წარმატება რომ არ ვუსურვო, არ შემიძლია, – ამის შესახებ გარემოს დაცვისა და ბუნებრივი რესურსების კომიტეტის თავმჯდომარემ, მაია ბითაძემ „ქრონიკასთან“ განაცხადა.
„საოცრებებს სჩადიან, როგორც საშინაო, ისე საგარეო ფრონტზე. სრულიად გაურკვეველია, რა უნდათ. ერთია ნათელი – ამ ადამიანების ხელში რაიმე კორპორაციული მმართველობა წარმოუდგენელია, იმდენად დიდი აქვთ ზიზღი არამხოლოდ მოსახლეობის, არამედ ერთმანეთისაც კი. მგონია, რომ ისინი ურთიერთბრალდებების კიდევ უფრო აქტიურ ფაზაში გადავლენ, რადგან რაც ჩვენ თუნდაც გუშინ ვიხილეთ, არამხოლოდ პოლიტიკური მორალის მხრიდან, არამედ სამართლებრივადაც არ შეიძლება. თუ ასე აქვთ მოწყობილი პარტიის დებულება, რომ პირდაპირ ეთერში წერილობით შეიძლება დაადასტურო ვინმეს რიცხავ თუ არა პარტიიდან, არ ვიცი. გარდა იმისა, რომ სამართლებრივი აბსურდის მოწმეები გავხდით, დიდი უპასუხისმგებლობა ვნახეთ „ნაციონალური მოძრაობის“ ამომრჩევლის მიმართ“, – აღნიშნა ბითაძემ.