ნატოს წევრი სახელმწიფოები ჯერ ვერ შეთანხმდნენ განახლებულ წლიურ პროგრამაში ჩამოთვლილი რეფორმები არის თუ არა ის პირობები, რომლითაც უკრაინა ალიანსში შეიძლება გაწევრიანდეს, თუ ეს კიევის ალიანსთან დაახლოების ინსტრუმენტია, – წერს გამოცემა EURACTIV-ი სტატიაში სათაურით აშშ და გერმანია კვლავ ერიდებიან უკრაინის ნატოში სწრაფად გაწევრიანების მხარდაჭერას.
გამოცემა ნატოს დიპლომატებზე დაყრდნობით იუწყება, რომ გერმანია და აშშ მოითხოვენ, რომ უკრაინის ნატოში გაწევრიანების პროცესი წარიმართოს პირობებით და არა პოლიტიკური მოსაზრებებით.
ერთ-ერთმა დიპლომატიურმა წყარომ გამოცემასთან საუბარში აღნიშნა, რომ ეს ნიშნავს, რომ მას შემდეგ, რაც რეფორმების განხორციელების პირობები დაკმაყოფილდება, უკრაინის ალიანსში გაწევრიანების საკითხი დღის წესრიგში შეიძლება დადგეს.
გამოცემის სხვა თანამოსაუბრეებმა განაცხადეს, რომ რეფორმის პროგრამა არ შეიცავს პირობების ჩამონათვალს, მაგრამ არის ე.წ. მაჩვენებელი ან ინსტრუმენტი პროგრესის მონიტორინგისა და ალიანსის ქვეყნების ლიდერების ინფორმირებისთვის.
ამასთან, გამოცემა აღნიშნავს, რომ რეფორმების სფეროების აღწერა, როგორც წესი, ნატოს წევრებს მანევრირების ადგილს უტოვებს, რადგან ისინი არ არიან მიბმული პროგრესის მკაცრ შეფასებაზე, არამედ გამოხატავენ თავიანთ პოლიტიკურ მოსაზრებას.
როგორც გამოცემა წერს, პირობების დაკმაყოფილების დეტალების ნაკლებობის გამო, ასევე არსებობს რისკი, რომ რეფორმები არასდროს იქნება საკმარისი, რაც უფრო ართულებს გაწევრიანებისთვის მწვანე შუქის ანთებას.
“საბოლოოდ, ეს [საკითხი] რჩება პოლიტიკურ გადაწყვეტილებად”, – აღნიშნა ნატოს დიპლომატმა.
ნატოს კიდევ ერთმა დიპლომატმა განაცხადა, რომ რუსეთთან ომი ხვალ რომ დასრულდეს და უკრაინამ დააკმაყოფილოს რეფორმების გეგმაში ჩამოთვლილი ყველა პირობა, ნატოს წევრებს მაინც მოუწევთ მოწვევაზე თანხმობის მიცემა, რაც შეიძლება რთული პროცესი იყოს.