“არსებობს საქმეები რომლებიც ჩუმად უნდა აკეთო და არის რაღაც, სადაც აუცილებლად უნდა იხმაურო”

ბედნიერი ვარ, რომ ამ უნიკალური პროექტის განხორციელებაში მცირე წვლილი მეც შევიტანე, – ამის შესახებ მედიაჰოლდინგ “კვირას” დამფუძნებელი და ხელმძღვანელი, ქეთი ხოსიტაშვილი წერს.

“არსებობს საქმეები, რომლებიც ჩუმად უნდა აკეთო და არის რაღაც, სადაც აუცილებლად უნდა იხმაურო!
ვფიქრობ, პროექტი, რომელიც ჩემმა ორმა საუკეთესო მეგობარმა განახორციელა, აუცილებლად იმსახურებს ხმამაღალ აღნიშვნას.
უნიკალური გამოცემა – „თბილისური რეტროსპექტივა” ძალიან ღირებული შენაძენია ქვეყნისთვის, ქალაქისთვის, ადამიანებისთვის, ვისთვისაც სულ ერთი არ არის ჩვენი ისტორია…
ალბომზე ძალიან დიდი ხანი იმუშავეს მამუკამ და მირიანმა – თავს მოუყარეს, აღრიცხეს და დაამუშავეს ეროვნულ ბიბლიოთეკაში დაცული მდიდარი საარქივო მასალა, ამავე დროს, გამოცემის სრულყოფის მიზნით, იზრუნეს თბილისის სხვა საცავებსა და არქივებში არსებული ისტორიული დოკუმენტების, მათ შორის თბილისის ისტორიული რუკების მოპოვებაზე.
შეგროვებისა და დამუშავების შემდეგ, შედგა სიები, შედარდა მონაცემები, მოხდა მასალის გაციფრება, ბიბლიოგრაფიული აღწერა. შედეგად, გამოიცა უნიკალური, ორენოვანი (ქართული, ინგლისური) ალბომი, რომელშიც ქრონოლოგიურიად, სხვადასხვა პერიოდის ისტორიული რუკების, გრავიურების, ნახატების, ფოტოების მეშვეობით, ასახულია ქალაქ თბილისის ზრდისა და განვითარების ეტაპები, ქალაქის ფორმირება, მე-18 საუკუნის ვახუშტისეული პერიოდიდან დღევანდლამდე.
ალბომი შესანიშნავი საჩუქარია თბილისის ისტორიით, კულტურით, არქიტექტურითა და ურბანული განვითარებით დაინტერესებულ ფართო საზოგადოებისთვის, ასევე სხვადასხვა სფეროს სპეციალისტებისთვის, ქვეყნისა და ქალაქ თბილისის სტუმრებისთვის, ახალგაზრდა თაობისთვის, რომლებსაც მიეცემათ საშუალება, მეტი გაიგონ დედაქალაქის ისტორიისა და კულტურის, ყოფისა და ცხოვრების შესახებ.
ბედნიერი ვარ, რომ ამ უნიკალური პროექტის განხორციელებაში მცირე წვლილი მეც შევიტანე ❤
დიდი მადლობა თბილისის საკრებულო / Tbilisi City Assembly-ს თბილი მასპინძლობისთვის ❤ ვფიქრობ, პრეზენტაციამ შესანიშნავად ჩაიარა!
P.S: Mirian Khositashvili და Mamuka Salukvadze სათქმელი კიდევ ბევრი მაქვს, მაგრამ მომავლისთვის დავიტოვებ… აი, იმ დროისთვის, ყველა საერთო ჩანაფიქრს ხორცს რომ შევასხამთ და მერე ხმაური ჩემზე იყოს… რაც არ მიჭირს, ეგ არის ❤”, – წერს ქეთი ხოსიტაშვილი.