ევროკომისიის პრეზიდენტმა, ურსულა ფონ დერ ლაიენმა არაბთა გაერთიანებულ საამიროებში, ქალაქ დუბაიში გაერთიანებული ერების ორგანიზაციის კლიმატის ცვლილებებთან გამკლავების 28-ე კონფერენციაზე სიტყვით გამოსვლისას კლიმატის ცვლილებებით გამოწვეულ პრობლემებზე ისაუბრა.
მისი თქმით, სამიტის მონაწილეები ყველაზე დაუცველი მოქალაქეების დასაცავად გადამწყვეტ ნაბიჯებს გადადგამენ, რომლებიც კლიმატის ცვლილების გამო საშინელ დანაკარგსა და ზიანს განიცდიან
„ამ [კლიმატის ცვლილებებთან გამკლავების] სამიტზე ჩვენ გადავდგამთ გადამწყვეტი მნიშვნელობის ნაბიჯს მთელი მსოფლიოს მასშტაბით ყველაზე დაუცველი მოქალაქეების დასაცავად. ისინი კლიმატის ცვლილების გამო საშინელ დანაკარგსა და ზიანს განიცდიან. ჩვენ მათ გვერდში უნდა დავუდგეთ. ეს სამიტი არის ამბიციაზე, სამიზნეებსა და ფინანსებზე. ამ სამიტს შეუძლია ისტორია შეცვალოს. წინა გაზაფხულზე ევროკავშირი გამოვიდა მოწოდებით, რომ გავასამმაგოთ განახლებადი ენერგია და გავაორმაგოთ ენერგოეფექტიანობა 2030 წლისთვის. ჩვენ ამ ინიციატივაში თავდაპირველად რამდენიმე სახელმწიფო შემოგვიერთდა. ახლა კი ჩვენი ეს მოწოდება ძლიერ მოწოდებაში გადაიზარდა, რადგან მას 110-ზე მეტი ქვეყანა შეუერთდა. ახლა ყველას მოგიწოდებთ, რომ ეს სამიზნეები საბოლოო გადაწყვეტილებაში შევიტანოთ. ეს იქნება ძლიერი გზავნილი ინვესტორებისთვის. ეჭვგარეშეა, რომ მომავალი ეკუთვნის სუფთა და ხელმისაწვდომ ენერგიას. ჩვენ დაფინანსება უნდა გავზარდოთ და ეს სწრაფად გავაკეთოთ. ამისთვის გვჭირდება საერთაშორისო საფინანსო სისტემის რეფორმა“, – აღნიშნა ფონ დერ ლაიენმა.