“მხარეები, როგორც ჩანს, კვლავ აპირებენ, კონფრონტაციის ახალ ფაზაში შევიდნენ. პრემიერმინისტრ ნეთანიაჰუს განცხადების შესაბამისად, ისრაელი, ალბათ, საბრძოლო მოქმედებებს გააგრძელებს და ღაზის სამხრეთით რაიონების დაკავებას დაიწყებს, შესაბამისად, შეეცდება, წინააღმდეგობის ხაზი გაარღვიოს, რომელიც “ჰამასმა” ამ ზონაში შექმნა”, – ამის შესახებ უსაფრთხოებისა და სამხედრო საკითხების ანალიტიკოსმა, ვახტანგ მაისაიას ახლო აღმოსავლეთში არსებულ ვითარებაზე საუბრისას განაცხადა.
როგორც მაისაიამ მედიაჰოლდინგ “კვირას” პრესკლუბში სტუმრობისას აღნიშნა, ღაზის სექტორის ჩრდილოეთ ნაწილი “ჰამასის” და “ისლამური ჯიჰადის” ტერორისტული დაჯგუფებებისგან, ფაქტობრივად, უკვე გათავისუფლებულია და რჩება მთავარი, ყველაზე ძლიერი ციტადელი, სამხრეთის რაიონი, რომელიც სერიოზულ გამაგრებულ სისტემას წარმოადგენს.
“როგორც მოგეხსენებათ, 2 კვირის განმავლობაში მხარეებმა კატარის, ეგვიპტის და აშშ-ის მეშვეობით ცეცხლის შეწყვეტის შეთანხმებას მიაღწიეს და მძევლების გათავისუფლება დაიწყო. სავარაუდოდ, კონფლიქტის დეესკალაციის ფაზა უნდა განვითარებულიყო. სამწუხაროდ, 2 დღის წინ სიტუაცია კვლავ დაიძაბა. მხარეები, როგორც ჩანს, კვლავ აპირებენ, კონფრონტაციის ახალ ფაზაში შევიდნენ. პრემიერმინისტრ ნეთანიაჰუს განცხადების შესაბამისად, ისრაელი, ალბათ, საბრძოლო მოქმედებებს გააგრძელებს და ღაზის სამხრეთით რაიონების დაკავებას დაიწყებს, შესაბამისად, შეეცდება, წინააღმდეგობის ხაზი გაარღვიოს, რომელიც “ჰამასმა” ამ ზონაში შექმნა. მოგეხსენებათ, ღაზის სექტორის ჩრდილოეთ ნაწილი “ჰამასის” და “ისლამური ჯიჰადის” ტერორისტული დაჯგუფებებისგან, ფაქტობრივად, უკვე გათავისუფლებულია. რჩება მთავარი, ყველაზე ძლიერი ციტადელი, სამხრეთის რაიონი, რომელიც სერიოზულ გამაგრებულ სისტემას წარმოადგენს. მინდა, გითხრათ, რომ აქ საბრძოლო მოქმედებები ოთხივე სივრცეში ვითარდება. ესენია: კოსმოსი, ჰაერი, ხმელეთი და მიწისქვეშეთი, რომელიც ყველაზე საინტერესო მომენტია. კოსმოსი – საუბარია კიბერშეტევებზე, რომელსაც როგორც ერთი, ისე მეორე მხარე ახორციელებს. ჰაერი – ბუნებრივია, საუბარია იმაზე, რომ ისრაელი სამხედრო-საჰაერო ძალებს იყენებს. “ჰამასი” ბალისტიკურ- ტაქტიკურ
და ოპერატიულ- ტაქტიკურ სარაკეტო კომპლექსებს იყენებს. სახმელეთო – ორივე მხარე სახმელეთო დაჯგუფებებს იყენებს, “ცახალი” საარმიო შენაერთებს, “ჰამასი” კი ურბანისტული ტიპის საბრძოლო მოქმედებების ტაქტიკას. ორივე მხარეს საკმაოდ სერიოზული დანაკარგები აქვს. დაუდასტურებელი მონაცემებით, ისრაელმა, დაახლოებით, 160 საბრძოლო ტანკი დაკარგა. “ჰამასსაც” საკმაოდ სერიოზული დანაკარგები აქვს, დაახლოებით 2000-3000 ტერორისტის ლიკვიდაციაზეა საუბარი.
მიწისქვეშა ბრძოლები მიმდინარეობს. ღაზის სექტორში წლების განმავლობაში დაახლოებით 5000-ზე მეტი გვირაბია გაყვანილი, რომელთა საერთო მშენებლობა, დაახლოებით, 100 მილიონი დოლარი დაჯდა. ამ მშენებლობაში ჩრდილოკორეელი და რუსი სპეციალისტები მონაწილეობდნენ, რომლებიც “ჰამასს” ეხმარებოდნენ, რათა ფუნდამენტური, კაპიტალური მიწისქვეშა გვირაბები და საკომუნიკაციო სისტემები შეექმნათ, ისევე როგორც საბრძოლო მოქმედებების მართვის ცენტრები. ასე, რომ ვფიქრობ, ომის მეორე ფაზა გაცილებით სისხლისმღვრელი, უფრო მეტად დაძაბული იქნება, რადგან კონცენტრაცია სწორედ სამხრეთის მიმართულებით იქნება გადატანილი. სამხრეთის დაკავება კი არცთუ ისე იოლი საქმეა. ამავე დროს, უნდა ვივარაუდოთ, რომ შესაძლოა, საბრძოლო მოქმედებები ლიბანიდანაც განხორციელდეს. “ჰეზბოლა” გააქტიურდა. როგორც ჩანს, “ჰეზბოლამ” და “ჰამასმა” საბრძოლო მოქმედებების განვითარების კუთხით ურთიერთკოორდინაციას მიაღწიეს. ასეთი კონფრონტაციული მოდელის ფონზე გამორიცხული არაა, რომ ირანის და ისრაელის დაპირისპირებაც მივიღოთ. სიტუაცია საკმაოდ დაძაბულია და შესაძლოა, 2024 წლის საახალწლო პერიოდი ძალიან ცხელი იყოს. ეს სამწუხარო რეალობაა. იმედია, ეს პროგნოზი არ გამართლდება, თუმცაღა, ამის მაღალი ალბათობა არსებობს.
ტყვეების რაოდენობა საგრძნობლად შემცირდა. მხარეები, როგორც ჩანს, მზად იყვნენ საბრძოლო მოქმედებების განახლებაზე გადასულიყვნენ.
კიდევ ერთი რამ მინდა, გითხრათ: როგორც ჩანს, აშშ ისრაელისთვის სამხედრო ასიგნების გამოყოფას დააჩქარებს, რომელიც სენატის რესპუბლიკური უმრავლესობის წარმომადგენლების მიერ იქნა შეჩერებული. როგორც ჩანს, 11 დეკემბრიდან უკრაინისა და ისრაელისთვის ცალკე პაკეტის კუთხით თანხების გამოყოფა განახლდება. მოგეხსენებათ, ისრაელსა და ამერიკას შორის 4 მნიშვნელოვანი ხელშეკრულება არსებობს, რომლის მიხედვითაც, ფაქტობრივად, ორმხრივი სამხედრო- პოლიტიკური ბლოკია შექმნილი. 2016 წლის ხელშეკრულების მიხედვით, ამერიკამ ვალდებულება აიღო, რომ ისრაელს თავდაცვისუნარიანობის განმტკიცების მიმართულებით 3 მილიარდი დოლარი გამოუყოს”, – განაცხადა მაისაიამ.
ცნობისთვის, ისრაელის არმია ღაზის სექტორში სახმელეთო ოპერაციას აფართოებს.
ამის შესახებ IDF-ის სპიკერმა, კონტრადმირალმა, დანიელ ჰაგარიმ განაცხადა.
მისი თქმით, “ჩვენი ძალები პირისპირ ხვდებიან ტერორისტებს და კლავენ მათ.”
გაეროს ლტოლვილთა სააგენტოს შეფასებით, ღაზას სექტორში საკუთარი სახლები 1,8 მილიონმა ადამიანმა დატოვა.