ვენესუელაში მეზობელი გაიანის ნავთობით მდიდარი რეგიონის, ესეკიბოს მიერთების საკითხზე რეფერენდუმი ჩატარდა. ადგილობრივი ცესკოს ცნობით, მოსახლეობის 95%-ზე მეტმა ვენესუელის შემადგენლობაში ახალი შტატის – გაიანა-ესეკიბოს შექმნას და მისი მოსახლეობისთვის ვენესუელის მოქალაქეობის მინიჭებას მხარი დაუჭირა.
ვენესუელის ხელისუფლებამ რეფერენდუმი მას შემდეგ ჩაატარა, რაც 1 დეკებმერს გაეროს საერთაშორისო სასამართლომ ოფიციალურ კარაკასს გაიანის ტერიტორიულ მთლიანობის დარღვევით რაიმე ქმედებების განხორციელება აუკრძალა. ვენესუელისა და გაიანის ტერიტორიული დავის განხილვა სასამართლოში სულ მცირე 2024 წლის გაზაფხულამდე არ გაიმართება, ხოლო გადაწყვეტილების მისაღებად სასამართლოს შესაძლოა წლების დასჭირდეს – თუმცა რეფერენდუმის გამართვა გაეროს საერთაშორისო სასამართლოს არ აუკრძალავს.
ვენესუელის ლიდერის, ნიკოლას მადუროს განცხადებით, ქვეყნის მოსახლეობამ თავისი პოზიცია ხმამაღლა და გარკვევით დააფიქსირა. თავის მხრივ, გაიანის პრეზიდენტმა ირფაან ალიმ აღნიშნა, რომ ესეკიბოს რეგიონი გაიანელებს ეკუთვნის, მთავრობა კი „ყველაფერს აკეთებს იმისთვის, რომ ქვეყნის საზღვრები ხელუხლებელი დარჩეს“.
ვენესუელისა და გაიანის ტერიტორიულ დავას გრძელი ისტორია აქვს. ვენესუელა მიიჩნევს, რომ ესეკიბოს რეგიონი ესპანური კოლონიალიზმის პერიოდში მის საზღვრებში შედიოდა. კარაკასი არ ეთანხმება 1899 წლის საერთაშორისო საარბიტრაჟო ტრიბუნალის გადაწყვეტილებას, რომელმაც ესეკიბოს რეგიონი ბრიტანულ გვიანას (ახლანდელი გაიანა) მიაკუთვნა.